Read Hazaragi امثال 9 Bible Online

امثال 9 - Hazaragi bible

امثال 9

¹حِکمَت قَصر خُو ره جور کده، و ھفت ستُون شی ره تَراش کده۔

²اُو مالای خُو ره حلال کده و نان تَیار کده، و قد ازُو قتی شرابِ انگُور اَم تَھیه کده۔ اُو دِستَرخون خُو ره اَوار کده،

³و کنِیزای خُو ره رَیی کده تاکه از بِلند تَرِین جای ھای شار مردُم ره کُوی کُنه:

⁴”کسای که نادو اَسته اِینجی بیه۔“ حِکمَت بَلدِه مردُمِ کمعقل مُوگه که،

⁵”بیِید، از نانِ که تَیار کدیم، بُخورِید و از شرابِ انگُورِ که گَٹ کدیم، وُچی کُنِید۔

⁶سادَگی و نادانی ره ایله کُنِید و زِنده بُمَنِید، و مُستَقِیم دَ راهِ عقل و دانایی بورِید۔

⁷ھر کسی که آدمِ رِیشخَندگر ره ملامَت کُنه، اُو خود ره رَسوا مُونه، و ھر کسی که یگ آدمِ بَدکار ره سرزنِش کُنه، اُو بَلدِه خود شی عَیب حِساب مُوشه۔

⁸آدمِ رِیشخَندگر ره سرزنِش نَکُو، چُون اُو از تُو بَد مُوبَره۔ آدمِ دانا ره سرزنِش بُکُو، و اُو تُو ره دوست مِیدَنه۔

⁹شخصِ دانا ره نَصِیحَت کُو، و اُو داناتَر مُوشه؛ آدمِ صادِق ره تعلِیم بِدی، اُو عِلم شی زیاد مُوشه۔“

¹⁰شُروعِ حِکمَت تَرس از خُداوند اَسته، شِناختِ خُدای پاک، دانایی حِساب مُوشه،

¹¹”چُون دَ واسِطِه ازمه، یعنی حِکمَت، طُولِ عُمر تُو دِراز مُوشه، و سال ھای زِندَگی تُو کَلوتَر۔“

¹²اگه حَکِیم و دانا اَستی، فایدِه شی ره بَلدِه خود خُو مِیگِیری، و اگه حِکمَت ره رِیشخَند کُنی، نُقص شی ره خود تُو باید بَرداشت کنی۔

¹³خاتُونِ بےعقل، قَوشَرهگَر اَسته، اُو نادو اَسته و ھیچ چِیز ره نَمُوفامه۔

¹⁴اُو دَ دَرگِه خانِه خُو، یا دَ یگ چَوکی دَ یگو بِلندی شار مِیشِینه

¹⁵و آدمای ره که از اُونجه تیر مُوشه، کُوی مُونه، یعنی امُو کسای ره که دَ راهِ خودگُن خُو رَیی اَسته:

¹⁶”کسی که نادو اَسته اِینجی بیه!“ و اُو دَ مردُمِ کمعقل مُوگه:

¹⁷”آوِ دُزی کده شِیرِین اَسته، و نانِ که تاشَکی خورده مُوشه، کَلو مَزهداره۔“

¹⁸مگم اُونا پَی نَمُوبَره که خانِه ازُو جای مُردا یَه و عاقبَتِ ھر کسی ره که دعوَت کده، دَ تاتَرِینِ عالمِ مُردا۔