Read Hazaragi متی 1 Bible Online

متی 1 - Hazaragi bible

متی 1

¹پُشت نامِه عیسیٰ مسیح، اَولادِه داوُود، اَولادِه اِبراهِیم:

²اِبراهِیم آتِه اِسحاق، اِسحاق آتِه یعقُوب و یعقُوب آتِه یهُودا و بِرارونِ ازُو بُود؛

³یهُودا آتِه فارِص و زارِح از تامار شُد۔ فارِص آتِه حَصرون، حَصرون آتِه ارام،

⁴ارام آتِه عَمِیناداب، عَمِیناداب آتِه نَحشون، نَحشون آتِه سَلمون،

⁵و سَلمون آتِه بوعَز از راحاب شُد۔ بوعَز آتِه عوبید از رُوت شُد۔ عوبید آتِه یِسَّی

⁶و یِسَّی آتِه داوُود پادشاه بُود۔ داوُود آتِه سُلَیمان از خاتُونِ اوریا شُد۔

⁷سُلَیمان آتِه رِحُبعام، رِحُبعام آتِه اَبیا، اَبیا آتِه آسا،

⁸آسا آتِه یِهوشافاط، یِهوشافاط آتِه یورام، یورام آتِه عُزیا،

⁹عُزیا آتِه یوتام، یوتام آتِه آحاز، آحاز آتِه حِزقیا،

¹⁰حِزقیا آتِه مَنَسّی، مَنَسّی آتِه آمون و آمون آتِه یوشیا بُود۔

¹¹یوشیا آتِه یِکُنیا و بِرارونِ ازُو شُد دَ زمانی که یهُودیا دَ بابُل بُرده شُد۔

¹²بعد از اسِیر شُدو دَ بابُل: یِکُنیا آتِه شِئلتی‌ئیل و شِئلتی‌ئیل آتِه زِروبابِل

¹³و زِروبابِل آتِه اَبِیهُود و اَبِیهُود آتِه ایلیاقِیم و ایلیاقِیم آتِه عازور

¹⁴و عازور آتِه صادوق و صادوق آتِه یاکِیم و یاکِیم آتِه ایلِیهُود

¹⁵و ایلِیهُود آتِه ایلعازر و ایلعازر آتِه مَتان و مَتان آتِه یعقُوب

¹⁶و یعقُوب آتِه یوسُف شُد و یوسُف شُوی مَریم بُود و مَریم عیسیٰ ره که مسیح گُفته مُوشُد، دَ دُنیا اَوُرد۔

¹⁷پس تمامِ نَسل ها از اِبراهِیم تا داوُود چارده نَسل و از داوُود تا بُرده شُدونِ یھُودیا دَ بابُل چارده نَسل و از بُرده شُدو دَ بابُل تا مسیح چارده نَسل اَسته۔

¹⁸تَوَلُدِ عیسیٰ مسیح اینی رقم واقِع شُد: وختِیکه مَریَم آبِه عیسیٰ خوستِه یوسُف بُود، پیش ازی که ھر دُوی شی یگجای شُنه، اُو دَ وسِیلِه روح اُلقُدس حامِله شُد۔

¹⁹خوستِه شی یوسُف، ازی که آدمِ دُرُستکار بُود و نَمیخاست اُو ره رَسوا کُنه، قَصد کد که اُو ره خَپ-و-چُپ ایله بِدیه۔

²⁰وختِیکه اُو ھنوز دَزی باره فِکر مُوکد، یگ ملایکِه خُداوند دَ عالمِ خاو دَزُو ظاهِر شُده گُفت: ”اَی یوسُف اَولادِه داوُود، از گِرِفتونِ مَریَم بَحَیثِ خاتُون خُو ترس نَخور، چُون نِلغِه که دَ کَورِه شی دَ وجُود اَمَده از روح اُلقُدس اَسته۔

²¹اُو یگ باچه دَ دُنیا میره و تُو نام شی ره عیسیٰ بیل، چُون اُو قَوم خُو ره از گُناه های شی نِجات مِیدیه۔“

²²پگِ امزی چِیزا واقِع شُد تا تورِه که خُداوند دَ وسِیلِه پَیغمبر گُفتُد، پُوره شُنه:

²³”اینه، یگ دُخترِ خانه حامِله مُوشه و یگ باچه دَ دُنیا میره و نام شی ره «عِمانُوئیل» میله،“ که معنای شی «خُدا قد از مو» اَسته۔

²⁴وختِیکه یوسُف از خاو بیدار شُد، اُو امُو رقم کد که ملایکِه خُداوند دَزُو اَمر کدُد: اُو مَریَم ره بَحَیثِ خاتُون خُو گِرِفت۔

²⁵مگم اُو قد شی یگجای نَشُد تا وختِیکه مَریَم باچِه خُو ره دَ دُنیا اَوُرد؛ و یوسُف نامِ ازُو ره عیسیٰ ایشت۔