Read Hazaragi متی 2 Bible Online

متی 2 - Hazaragi bible

متی 2

¹بعد از تَوَلُدِ عیسیٰ دَ بَیت اُللَحَمِ یهُودیه، دَ زمانِ هیرودیس پادشاه، چند سِتاره شِناس از سرزمِینای مشرِق دَ شارِ اورُشَلیم اَمَد

²و پُرسان کده گُفت:”کُجا یَه امُو نَوزَیدِه که پادشاهِ یھُودیا اَسته؟ چُون مو سِتارِه شی ره دَ سرزمِینای مشرِق دِیدی و اَمَدے که اُو ره پرَستِش کُنی۔“

³وختِیکه هیرودیس پادشاه اِی توره ره شِنید، اُو و پگِ مردُمِ اورُشَلیم قد ازُو وَرخطا شُد

⁴و اُو تمامِ پیشوایونِ بُزُرگ و عالِمای دِین ره از قَومِ اِسرائیل جم کد و از وا پُرسان کد که مسیح دَ کُجا باید تَوَلُد شُنه۔

⁵اُونا دَزُو گُفت: ”دَ بَیت اُللَحَمِ یهُودیه؛ چُون دَ وسِیلِه پَیغمبر اینی رقم نوِشته شُده:

⁶’و تُو، اَی بَیت اُللَحَم، دَ سرزمِینِ یهُودیه دَ مینکلِ حُکمرانای یهُودا از هیچ نِگاه کمتَر نِیَستی، چراکه از تُو یگ حُکمران ظهُور مُونه که قَوم مه اِسرائیل ره رهبری مُوکُنه۔‘“

⁷اوخته هیرودیس، سِتاره شِناسا ره تاشَکی کُوی کد و دَ بارِه وختِ ظھُورِ سِتاره، ازوا تَحقِیق کد۔

⁸بعد ازُو اُونا ره دَ بَیت اُللَحَم رَیی کده گُفت: ”بورِید و امُو نِلغه ره خُوب اوگَل کُنِید؛ غَیتِ که اُو ره پَیدا کدِید دَز مه خبر بِدِید تا ما ام بییُم و اُو ره پرستِش کنُم۔“

⁹بعد از شِنِیدونِ تورِه پادشاه، سِتاره شِناسا دَ راهِ خُو رَیی شُد و سِتارِه ره که اُونا دَ مشرِق هُوش کدُد پیش پیشِ ازوا مورَفت تا دَ بَلِه سر امزُو جای رسِیده ایسته شُد که نِلغه دَ اُونجی بُود۔

¹⁰وختِیکه اُونا سِتاره ره دِید، اُونا قد خوشی کَلو خوشحالی کد۔

¹¹امی که اُونا دَ داخِلِ خانه رفت و نِلغه ره قد آبِه شی مَریَم دِید، رُوی دَ خاک اُفتَده امُو نِلغه ره پرستِش کد و صندُوقای خزانِه خُو ره واز کده سَوغات ها، یعنی طِلّا، کُندُر و مُر دَزُو تقدِیم کد۔

¹²و ازی که دَ خاو دَزوا اَخطار دَده شُد که دُوباره پیشِ هیرودیس نَرَوه، اُونا از راهِ دِیگه پس سُون وطن خُو رفت۔

¹³بعد از رفتونِ سِتاره شِناسا، ملایکِه خُداوند دَ خاو دَ یوسُف ظاھِر شُده گُفت: ”باله شُو، نِلغه و آبِه شی ره گِرِفته دَ مِصر دُوتا کُو و دَ اَمُونجی بِشی تا غَیتِیکه تُو ره خبر بِدُم، چراکه هیرودیس دَ زُودی نِلغه ره مُوپاله تا اُو ره نابُود کُنه۔“

¹⁴اوخته یوسُف باله شُد و نِلغه و آبِه شی ره گِرِفته دَ وختِ شاو سُون مِصر رَیی شُد

¹⁵و تا مرگِ هیرودیس دَ اَمُونجی مَند۔ دَ امزی رقم تورِه که خُداوند دَ وسِیلِه پَیغمبر گُفته بُود پُوره شُد: ”باچِه خُو ره از مِصر کُوی کدُم۔“

¹⁶وختی هیرودیس دِید که سِتاره شِناسا اُو ره بازی دَده، اُو کَلو قار شُد و نفرا ره رَیی کد و تمامِ بچکِیچا ره دَ بَیت اُللَحَم و اَطراف شی که دُو ساله و کمتَر از دُو ساله بُود دَ قتل رَسَند، مُطابِق دَ زمانی که اُو از سِتاره شِناسا تَحقِیق کدُد۔

¹⁷اوخته توره ھای که دَ وسِیلِه اِرمیا پَیغمبر گُفته شُدُد، پُوره شُد:

¹⁸”یگ صَدا از رامه شِنِیده شُد، صَدای مَخته-و-چخرا و ماتمِ کٹه، راحیل بَلدِه بچکِیچای خُو چخرا مُونه و آرام نَمُوشه، چراکه اُونا دِیگه وجُود نَدَره۔“

¹⁹پس از مرگِ هیرودیس، ملایکِه خُداوند دَ مِصر دَ خاو دَ یوسُف ظاهِر شُده

²⁰گُفت: ”باله شُو، باچه و آبِه شی ره گِرِفته پس دَ سرزمِینِ اِسرائیل بورُو، چُون کسای که قَصدِ جانِ نِلغه ره کدُد، مُرده۔“

²¹اوخته یوسُف باله شُده باچه و آبِه شی ره گِرِفت و پس دَ سرزمِینِ اِسرائیل رفت۔

²²مگم وختی شِنِید که آرخِلاوس دَ جای آتِه خُو هیرودیس دَ بَلِه یهُودیه حُکمرانی مُونه، اُو از رفتو دَ اُونجی ترس خورد و بعد ازُو که دَ خاو دَزُو اَخطار دَده شُد، اُو دَ منطقِه جلِیلیه رفت

²³و دَ اُونجی رسِیده دَ یگ شار دَ نامِ ناصِره جای دَ جای شُد۔ دَمزی رقم تورِه که دَ وسِیلِه پَیغمبرا گُفته شُدُد ”اُو ناصِری گُفته مُوشه،“ پُوره شُد۔