Read Hazaragi متی 4 Bible Online

متی 4 - Hazaragi bible

متی 4

¹اوخته عیسیٰ دَ وسِیلِه روح اُلقُدس دَ بیابو هِدایت شُد تا اِبلِیس اُو ره وَسوَسه کنه۔

²اُو چِل شاو-و-روز روزه گِرِفت و بعد ازُو گُشنه شُد۔

³اوخته وَسوَسه‌گر دَ دِیرِ ازُو اَمَده گُفت: ”اگه تُو باچِه خُدا اَستی، دَ امزی سنگا بُگی که نان جور شُنه۔“

⁴عیسیٰ دَ جوابِ ازُو گُفت: ” دَ کلامِ خُدا نوِشته شُده که، ’اِنسان نَتَنھا دَ وسِیلِه نان زِنده مُومنه، بَلکِه دَ وسِیلِه هر تورِه که از دانِ خُدا بُر مُوشه۔‘“

⁵اوخته اِبلِیس عیسیٰ ره دَ شارِ مُقَدَّس بُرد و دَ بِلندی خانِه خُدا ایستَلجی کد

⁶و دَزُو گُفت: ”اگه تُو باچِه خُدا اَستی خود ره تا پورته کُو، چُون نوِشته شُده که، ’اُو دَ بارِه ازتُو دَ ملایکه ھای خُو حُکم مُونه و اُونا تُو ره دَ بَلِه دِستای خُو مِیگِیره، نَشُنه که پای تُو دَ کُدَم سنگ ڈَکه کُنه۔‘“

⁷عیسیٰ دَزُو گُفت: ”بسم نوِشته شُده که، ’تُو خُداوند-خُدای خُو ره آزمایش نَکُو!‘“

⁸بعد ازُو اِبلِیس اُو ره دَ بَلِه یگ کوهِ غَدر قِیل بُرده تمامِ مَملکتای دُنیا و شان-و-شَوکت شی ره دَزُو نِشو دَد

⁹و دَزشی گُفت: ”اگه رُوی دَ خاک اُفتَده مَره سَجده کُنی، پگِ امزیا ره دَز تُو مِیدُم۔“

¹⁰اوخته عیسیٰ دَز شی گُفت: ”دُور شُو، اَی شَیطو! چُون نوِشته شُده: ’خُداوند-خُدای خُو ره سَجده کُو و تَنھا اُو ره عِبادَت کُو۔‘“

¹¹بعد ازُو اِبلِیس اُو ره ایله کد و ملایکه ها اَمَده اُو ره خِدمت کد۔

¹²وختی عیسیٰ شِنِید که یحییٰ دِستگِیر شُده، اُو پس دَ جلِیلیه رفت

¹³و ناصِره ره ایله کده دَ کَفرناحُوم جای-دَ-جای شُد که دَ بَغلِ دریای جلِیلیه، دَ منطقای زبُولُون و نَفتالی بُود،

¹⁴تا چِیزی که دَ وسِیلِه اشعیای نَبی گُفته شُدُد، پُوره شُنه:

¹⁵”سرزمِینِ زبُولُون و سرزمِینِ نفتالی دَ راهِ دریا، دَ اُو طرفِ دَریای اُردُن، جلِیلیِه مِلَّت ھای غَیرِ یهُود،

¹⁶قَومی که دَ ترِیکی زِندگی مُوکُنه نُورِ بُزُرگ ره مِینگره و دَ بَلِه کسای که دَ سرزمِینِ مرگ و سایِه شی زِندگی مُوکُنه، یگ نُور روشَنی مُونه۔“

¹⁷امزُو زمان عیسیٰ دَ اِعلانِ پَیغام خُو شُروع کده گُفت: ”توبه کنِید، چراکه اَمَدونِ پادشاهی آسمو نزدِیک شُده۔“

¹⁸وختی عیسیٰ دَ بَغلِ دریای جلِیلیه قَدم مِیزَد، دُو بِرار یعنی شِمعونِ مشهُور دَ پِطرُس و بِرار شی اَندریاس ره دِید که تورِ ماهی‌گِیری ره دَ دریا مِیندَزه، چُون اُونا ماهی‌گِیر بُود۔

¹⁹اُو دَزوا گُفت: ”از پُشتِ ازمه بیِید تا شُمو ره شِکارچی مردُم جور کنُم۔“

²⁰اُونا فَوری تور های ماهی‌گِیری خُو ره ایله کد و از پُشتِ ازُو رَیی شُد۔

²¹عیسیٰ دَ حالِیکه ازُونجی مورفت، دُو بِرارِ دِیگه یعنی یعقُوب باچِه زِبدی و بِرار شی یوحَنّا ره دِید که قد آتِه خُو زِبدی دَ کِشتی شِشته و تور های ماهی‌گِیری خُو ره آماده مُونه۔ اوخته اُو اُونا ره کُوی کد

²²و اُونا فَوری کِشتی و آتِه خُو ره ایله کده از پُشتِ ازُو رَیی شُد۔

²³عیسیٰ دَ سراسرِ جلِیلیه مِیگَشت و دَ عِبادت خانه های ازوا تعلِیم مِیدَد و خوشخبری پادشاهی خُدا ره اِعلان مُوکد و ھر رقم مَرَض و ناجوری مردُم ره شفا مِیدَد۔

²⁴پس نامِ ازُو دَ تمامِ سُوریه مشهُور شُد و اُونا تمامِ ناجورای ره که دَ مَرَض های رقم رقم و دَردها گِرِفتار بُود و ام جِندیا و مِرگی ھا و شَل ها ره دَ پیشِ ازُو میوُرد و اُو اُونا ره شفا مِیدَد۔

²⁵و جمعیت های کٹه از جلِیلیه، دیکاپولِیس، اورُشَلیم، یهُودیه و از اُو طرفِ دریای اُردُن از پُشتِ ازُو رَیی شُد۔