Read Hebrew Bible: Tanakh (Leningrad Codex) תהלים 147 Bible Online

תהלים 147 - Hebrew Bible: Tanakh (Leningrad Codex) bible

תהלים 147

¹הללו יה כי-טוב זמרה אלהינו; כי-נעים נאוה תהלה:

²בונה ירושלם יהוה; נדחי ישראל יכנס:

³הרפא לשבורי לב; ומחבש, לעצבותם:

⁴מונה מספר לכוכבים; לכלם, שמות יקרא:

⁵גדול אדונינו ורב-כח; לתבונתו, אין מספר:

⁶מעודד ענוים יהוה; משפיל רשעים עדי-ארץ:

⁷ענו ליהוה בתודה; זמרו לאלהינו בכנור:

⁸המכסה שמים בעבים, המכין לארץ מטר; המצמיח הרים חציר:

⁹נותן לבהמה לחמה; לבני ערב, אשר יקראו:

¹⁰לא בגבורת הסוס יחפץ; לא-בשוקי האיש ירצה:

¹¹רוצה יהוה את-יראיו; את-המיחלים לחסדו:

¹²שבחי ירושלם את-יהוה; הללי אלהיך ציון:

¹³כי-חזק בריחי שעריך; ברך בניך בקרבך:

¹⁴השם-גבולך שלום; חלב חטים, ישביעך:

¹⁵השלח אמרתו ארץ; עד-מהרה, ירוץ דברו:

¹⁶הנתן שלג כצמר; כפור, כאפר יפזר:

¹⁷משליך קרחו כפתים; לפני קרתו, מי יעמד:

¹⁸ישלח דברו וימסם; ישב רוחו, יזלו-מים:

¹⁹מגיד דברו (דבריו) ליעקב; חקיו ומשפטיו, לישראל:

²⁰לא עשה כן לכל-גוי, ומשפטים בל-ידעום, הללו-יה: