Read Hebrew Bible: Tanakh (Leningrad Codex) תהלים 29 Bible Online

תהלים 29 - Hebrew Bible: Tanakh (Leningrad Codex) bible

תהלים 29

¹מזמור, לדוד הבו ליהוה בני אלים; הבו ליהוה, כבוד ועז:

²הבו ליהוה כבוד שמו; השתחוו ליהוה, בהדרת-קדש:

³קול יהוה, על-המים אל-הכבוד הרעים; יהוה, על-מים רבים:

⁴קול-יהוה בכח; קול יהוה, בהדר:

⁵קול יהוה שבר ארזים; וישבר יהוה, את-ארזי הלבנון:

⁶וירקידם כמו-עגל; לבנון ושרין, כמו בן-ראמים:

⁷קול-יהוה חצב, להבות אש:

⁸קול יהוה יחיל מדבר; יחיל יהוה, מדבר קדש:

⁹קול יהוה יחולל אילות ויחשף יערות ובהיכלו; כלו, אמר כבוד:

¹⁰יהוה למבול ישב; וישב יהוה, מלך לעולם:

¹¹יהוה, עז לעמו יתן; יהוה יברך את-עמו בשלום: