Read Hebrew Bible: Tanakh (Leningrad Codex) תהלים 8 Bible Online

תהלים 8 - Hebrew Bible: Tanakh (Leningrad Codex) bible

תהלים 8

¹למנצח על-הגתית, מזמור לדוד:

²יהוה אדנינו, מה-אדיר שמך בכל-הארץ; אשר תנה הודך, על-השמים:

³מפי עוללים וינקים יסדת עז למען צורריך; להשבית אויב, ומתנקם:

⁴כי-אראה שמיך מעשי אצבעתיך; ירח וכוכבים, אשר כוננתה:

⁵מה-אנוש כי-תזכרנו; ובן-אדם, כי תפקדנו:

⁶ותחסרהו מעט מאלהים; וכבוד והדר תעטרהו:

⁷תמשילהו במעשי ידיך; כל שתה תחת-רגליו:

⁸צנה ואלפים כלם; וגם, בהמות שדי:

⁹צפור שמים ודגי הים; עבר, ארחות ימים:

¹⁰יהוה אדנינו; מה-אדיר שמך, בכל-הארץ: