Read Hebrew Bible: Tanakh (Leningrad Codex) תהלים 81 Bible Online

תהלים 81 - Hebrew Bible: Tanakh (Leningrad Codex) bible

תהלים 81

¹למנצח על-הגתית לאסף:

²הרנינו לאלהים עוזנו; הריעו, לאלהי יעקב:

³שאו-זמרה ותנו-תף; כנור נעים עם-נבל:

⁴תקעו בחדש שופר; בכסה, ליום חגנו:

⁵כי חק לישראל הוא; משפט, לאלהי יעקב:

⁶עדות ביהוסף שמו, בצאתו על-ארץ מצרים; שפת לא-ידעתי אשמע:

⁷הסירותי מסבל שכמו; כפיו, מדוד תעברנה:

⁸בצרה קראת, ואחלצך אענך בסתר רעם; אבחנך על-מי מריבה סלה:

⁹שמע עמי ואעידה בך; ישראל, אם-תשמע-לי:

¹⁰לא-יהיה בך אל זר; ולא תשתחוה, לאל נכר:

¹¹אנכי יהוה אלהיך, המעלך מארץ מצרים; הרחב-פיך, ואמלאהו:

¹²ולא-שמע עמי לקולי; וישראל, לא-אבה לי:

¹³ואשלחהו בשרירות לבם; ילכו, במועצותיהם:

¹⁴לו, עמי שמע לי; ישראל, בדרכי יהלכו:

¹⁵כמעט אויביהם אכניע; ועל צריהם, אשיב ידי:

¹⁶משנאי יהוה יכחשו-לו; ויהי עתם לעולם:

¹⁷ויאכילהו מחלב חטה; ומצור, דבש אשביעך: