Read Hebrew Bible: Tanakh (Leningrad Codex) תהלים 83 Bible Online

תהלים 83 - Hebrew Bible: Tanakh (Leningrad Codex) bible

תהלים 83

¹שיר מזמור לאסף:

²אלהים אל-דמי-לך; אל-תחרש ואל-תשקט אל:

³כי-הנה אויביך יהמיון; ומשנאיך, נשאו ראש:

⁴על-עמך יערימו סוד; ויתיעצו, על-צפוניך:

⁵אמרו, לכו ונכחידם מגוי; ולא-יזכר שם-ישראל עוד:

⁶כי נועצו לב יחדו; עליך, ברית יכרתו:

⁷אהלי אדום וישמעאלים, מואב והגרים:

⁸גבל ועמון ועמלק; פלשת, עם-ישבי צור:

⁹גם-אשור נלוה עמם; היו זרוע לבני-לוט סלה:

¹⁰עשה-להם כמדין; כסיסרא כיבין, בנחל קישון:

¹¹נשמדו בעין-דאר; היו דמן, לאדמה:

¹²שיתמו נדיבמו כערב וכזאב; וכזבח וכצלמנע, כל-נסיכמו:

¹³אשר אמרו נירשה לנו; את, נאות אלהים:

¹⁴אלהי, שיתמו כגלגל; כקש, לפני-רוח:

¹⁵כאש תבער-יער; וכלהבה, תלהט הרים:

¹⁶כן תרדפם בסערך; ובסופתך תבהלם:

¹⁷מלא פניהם קלון; ויבקשו שמך יהוה:

¹⁸יבשו ויבהלו עדי-עד, ויחפרו ויאבדו:

¹⁹וידעו, כי-אתה שמך יהוה לבדך; עליון, על-כל-הארץ: