Read Hebrew Bible: Tanakh (Leningrad Codex) מיכה 1 Bible Online

מיכה 1 - Hebrew Bible: Tanakh (Leningrad Codex) bible

מיכה 1

¹דבר-יהוה אשר היה, אל-מיכה המרשתי, בימי יותם אחז יחזקיה מלכי יהודה; אשר-חזה על-שמרון וירושלם:

²שמעו עמים כלם, הקשיבי ארץ ומלאה; ויהי אדני יהוה בכם לעד, אדני מהיכל קדשו:

³כי-הנה יהוה יצא ממקומו; וירד ודרך על-במותי (במתי) ארץ:

⁴ונמסו ההרים תחתיו, והעמקים יתבקעו; כדונג מפני האש, כמים מגרים במורד:

⁵בפשע יעקב כל-זאת, ובחטאות בית ישראל; מי-פשע יעקב, הלוא שמרון, ומי במות יהודה, הלוא ירושלם:

⁶ושמתי שמרון לעי השדה למטעי כרם; והגרתי לגי אבניה, ויסדיה אגלה:

⁷וכל-פסיליה יכתו, וכל-אתנניה ישרפו באש, וכל-עצביה אשים שממה; כי מאתנן זונה קבצה, ועד-אתנן זונה ישובו:

⁸על-זאת אספדה ואילילה, אילכה שילל (שולל) וערום; אעשה מספד כתנים, ואבל כבנות יענה:

⁹כי אנושה מכותיה; כי-באה עד-יהודה, נגע עד-שער עמי עד-ירושלם:

¹⁰בגת אל-תגידו, בכו אל-תבכו; בבית לעפרה, עפר התפלשתי (התפלשי):

¹¹עברי לכם יושבת שפיר עריה-בשת; לא יצאה יושבת צאנן, מספד בית האצל, יקח מכם עמדתו:

¹²כי-חלה לטוב יושבת מרות; כי-ירד רע מאת יהוה, לשער ירושלם:

¹³רתם המרכבה לרכש יושבת לכיש; ראשית חטאת היא לבת-ציון, כי-בך נמצאו פשעי ישראל:

¹⁴לכן תתני שלוחים, על מורשת גת; בתי אכזיב לאכזב, למלכי ישראל:

¹⁵עד, הירש אבי לך, יושבת מרשה; עד-עדלם יבוא כבוד ישראל:

¹⁶קרחי וגזי, על-בני תענוגיך; הרחבי קרחתך כנשר, כי גלו ממך: ס