Read Highland Puebla Nahuatl San Marcos 15 Bible Online

San Marcos 15 - Highland Puebla Nahuatl bible

San Marcos 15

¹Huan imostica cuac santanesic ya, ijcuacón in tayecanani tiopixcame mosentilijque ihuan in huehuentzitzin huan in tanextiliani den tanahuatil de Moisés; huan no yetoyaj nochi in huejueyin tamachilejque judíos. Huan cuiyacque Jesús tzicautiyáj huan quitemactijque ihuan in hueyi tequihua Pilato.

²Huan Pilato quitajtanilij Jesús ijcuín: ―¿Cox tejua titayecanque de judíos? Huan tananquilij Jesús ijcuín: ―Quema, ijcón queme tejuatzin tiquijtoa.

³Huan ijcón in tayacanani tiopixcame quiteluiliayaj Jesús ica míac tataman.

⁴Huan ocsepa Pilato quitajtanilij Jesús ijcuín: ―¿Amo teyica titananquilía? Xiquita ica míac tataman mitzteluilíaj in tagayot.

⁵Huan nión ica por nojón matájtanti tananquilij Jesús. Huan ica ya nojón in Pilato amo quimatía oc toni quichihuas oc. Nican tajtoa de queniu quitelchiuque Jesús Temaquixtijque ma quimictican (Mt. 27.15‑31; Lc. 23.13‑25; Jn. 18.38―19.16)

⁶Huan tech ne tonalme de nijín tajyohuilis iluit, Pilato mohuicaya de que quincahuilis se naquen tzactosque preso, aquen yesqui ten quitajtanisquíaj in tagayot.

⁷Huan oncaya se preso monotzaya Barrabás tzactoya ihuan ocsequin temictiani. Yejuan motehuijcaj ihuan in soldados den tayecanani huan quinmictijcaj miacque ya.

⁸Huan motoquijque miacque tagayot campa Pilato huan peuque quitajtanilíaj ma quinchihuili queme ipa huan ma quincahuilis se preso.

⁹Huan in Pilato quinnanquilij ijcuín: ―¿Cox nanquinequij ma nicajcahua in tayecanque de judíos?

¹⁰Huan ipa in Pilato quimatoyaya que in tayecanani tiopixcame quitemactijque Jesús ica ne xicolot porín quitahuelitacque.

¹¹Huan ijcón in tayecanani tiopixcame quincuejmolojque in tagayot huan quintajtolmagacque ma quitajtanilican Pilato ma cachi cuali ma quincahuili in preso Barrabás.

¹²Huan tananquilij in Pilato ijcuín: ―¿Toni nanquinequij ma nicchihuas ihuan nijín tagat naquen nanquinotzaj tayecanque de judíos?

¹³Huan ijcón nochi in tagayot tzajtzicque ijcuín: ―Xicuoupampilo.

¹⁴Huan in Pilato quintajtanilij ijcuín: ―¿Toni quichihuac nijín tagat ten amo cuali? Pero in tagayot cachi chicahuac tzajtzíaj ijcuín: ―Xicuoupampilo.

¹⁵Pero queme in Pilato amo quinequía ma quicualancaitacan nijín pueblojuani, ica ya nojón quincahuilij in preso Barrabás. Huan de ompa quitemactij Jesús ma quicuetaxuican huan ma quicuoupampilocan.

¹⁶Huan ijcón in soldados cuiyacque in Jesús icalteno in rey de ne cali monotza pretorio, huan quinsentilijque nochi in ocsequin soldados.

¹⁷Huan quitaquentijque Jesús ica se tilma morado, huan quicuatalilijque se corona yohualtic den tajquitil de huitzti.

¹⁸Huan peuque quiquejqueltajpaloayaj Jesús huan quiliayaj ijcuín: ―Timitzontajpaloaj, tejuatzin titayecanque den judíos.

¹⁹Huan quicuahuijuitequíaj Jesús ica se acat huan quiixchijchayaj. Huan motancuaquetzayaj para majyá quimohuistiliayaj Jesús.

²⁰Huan cuac quitamiquejquelojque ya Jesús, ijcuacón quiquixtilijque nitilma morado huan quitaquentijque ica yejua itasal huan cuiyacque para quicuoupampilosque. Nican tajtoa de que quicuoupampilotoj Jesús Temaquixtijque (Mt. 27.32‑44; Lc. 23.26‑43; Jn. 19.17‑27)

²¹Huan yetoya ojteno se tagat monotzaya Simón de Cirene, yejua tetat den Alejandro huan Rufo, huan huala den mila. Huan in soldados quinajnahuatijque ma cuica in cruz de Jesús.

²²Huan cuiyacque Jesús tech se lugar monotzaya Gólgota, quijtosnequi miquetzontecomaco.

²³Huan quimacacque Jesús ma tayi vino tamanelol ihuan se panti de se cuouchoquilo monotza mirra; pero Jesús amo tayic.

²⁴Huan cuac quicuoupampilojque ya, in soldados quichiuque ne tatanilis para quitasquía catín tasal de Jesús cuicasquía cada soldado. Huan ijcón quixejxelojque nochi itasal de Jesús.

²⁵Huan queman catca chicnahui hora de cualcan, ijcuacón quicuoupampilojque Jesús.

²⁶Huan quitenextilijque in tajtolme tenica quimictisque: “Yejua nijín in tayecanque de judíos”.

²⁷Huan no quincuoupampilojque ihuan nijín Jesús ome tachtequini, se iyecmacopaca huan ocsé iopochcopaca.

²⁸Huan nochi nijín motamichihuac ijcón queme quijtoa tech in Tajcuilolamatzin de Dios: “Quipouque in Taquehual de Dios ihuan in taca ten amo yolcualime”.

²⁹Huan naquen panoayaj quiquejquelojtoyaj huan cuahuihuicayaj huan quiliayaj Jesús ijcuín: ―Semi tixoxo, tejua ten ticuejuelosquía in tiopan de Dios huan eyi tonalica ocsepa ticchijchihuasquía.

³⁰Ximomaquixti tejua moselti, huan xitemo tech ne cruz.

³¹Huan ijcón in tayecanani tiopixcame huan in tanextiliani de tanahuatil de Moisés no quiquejqueloayaj Jesús huan moyolnojnotzayaj se huan ocsé ijcuín: ―Jesús quinequía quinmaquixtis ocsequin taca, pero yejua san amo huelis momaquixtis.

³²Huan ocsequin quilijque Jesús ijcuín: ―Como tejua ya in Cristo Temaquixtijque, titayecanque de Israel, axcan xitemo tech in cruz, para ma tiquitacan motanahuatil huan ijcón timitzneltoquilisque de que tejua in Cristo. Huan in tachtequini ten quincuoupampilojque inajnacastan Jesús, yejuan nojonques no quitejtelchihuayaj Jesús. Nican tajtoa de que Jesús Temaquixtijque momiquilij (Mt. 27.45‑56; Lc. 23.44‑49; Jn. 19.28‑30)

³³Huan cuac ajsic nepanta ya, ijcuacón pehuac tayohuayantis nochi in senmanahuac, huan huejcahuac hasta eyi hora de tiotac.

³⁴Huan tech eyi hora de tiotac, Jesús tzajtzic chicahuac huan quijtoj ijcuín: ―Eloi, Eloi, ¿lama sabactani? ―quijtosnequi: no Dios, no Dios, ¿queyé tinechsencahuac?

³⁵Huan queman ijcón quicacque nijín tajtolme, ijcuacón sequin den ompa yetoyaj quijtojque ijcuín: ―Xiquitacan, majyá quinotza Elías ne tanahuatijque de Dios.

³⁶Huan yajtihuetzic se tagat, quicuito se taman tasal ten posoni huan quiajaquij itech vinagre huan ica se acat quiyecapantalilij. Huan de ompa quintentalilij Jesús ma quichichina. Pero ocsequin tagayot quilijque ijcuín: ―Xicahua, ma tiquitacan cox hualas ne Elías huan cox quipalehuis temos.

³⁷Huan ijcón in Jesús tzajtzic chicahuac huan momiquilij.

³⁸Huan in tasal ica tatzacuaya calteno de tiopanijtic, yejua ne tzayanic sentatajco huan ome quisac desde ajco huan hasta tani.

³⁹Huan in capitán de soldados de romanos ijcatoya iixpampa Jesús. Huan queman quitac queniu tzajtzic Jesús huan miyic, ijcuacón yejua quijtoj ijcuín: ―Yec melau nijín tagat catca Teconetzin de Dios.

⁴⁰Huan no ompa yetoyaj sequin suatzitzin quitztoyaj huejca san. Ompa ihuan yetoyaj María Magdalena huan María tenan de Jacobo in taxocoyot, huan tenan de José, huan no yetoya Salomé.

⁴¹Nojonque sihuame quitoctiliayaj Jesús huan quitequitiliayaj Yejuatzin cuac yetoya tech in pueblo de Galilea. Huan no yetoyaj ocsequin miacque sihuame ten hualajque ihuan Jesús tech ne Jerusalén. Nican tajtoa de queniu quitalpachojque Jesús Temaquixtijque (Mt. 27.57‑61; Lc. 23.50‑56; Jn. 19.38‑42)

⁴²Huan cuac tapoyahuic ya, ijcuacón pehuac in hora cuac in tagayot judíos moyeyectaliayaj para imostica queman iluitonal de nesehuilis.

⁴³Huan huala campa rey Pilato se tagat monotzaya José de Arimatea. Yejua ne se tagat yolcuali ten pohuic ihuan in tamachilejque judíos huan no quichiaya ma ejco in tiempo queman Dios momasoutoc ica ihueyichicahualis ipan itaneltocacahuan. Huan ne tagat calayic ica míac ne yolchicahualis campa yetoya rey Pilato huan quitajtanilij inacayo in Jesús.

⁴⁴Huan in Pilato quimoucacayic que miyic ya Jesús huan quinotzac in capitán den soldados romanos huan quitajtanilij xe melau que miyic ya in Jesús.

⁴⁵Huan queman in capitán romano quilij que melau, ijcuacón quimactilijque José inacayo in Jesús.

⁴⁶Huan in José quicohuato se tilma huan quitemohuij Jesús itech in cruztzin, huan quiquemiloj huan quitalito itech se miquetecoch, ten ipa tachijchiu ya tech se tequespan. Huan quitetecuinojque se hueyi tet para ica quitentzacuasque in miquetecoch.

⁴⁷Pero in María Magdalena huan María tenan de José quitztoyaj campa quitalijque inacayo Jesús.