Read Hiligaynon 2 Samuel 22 Bible Online

2 Samuel 22 - Hiligaynon bible

2 Samuel 22

¹Ang Kanta ni David sa Iya nga Pagdaog (Salmo 18) Nagkanta si David sa Ginoo sang ginluwas siya sang Ginoo sa kamot sang iya mga kaaway kag kay Saul.

²Amo ini ang iya kanta: “Ikaw, Ginoo, ang akon palalipdan nga bato, ang akon mabakod nga palanaguan kag manughilway. Bilang palalipdan nga bato, makapanago ako sa imo. Ikaw ang akon taming kag gamhanan nga manluluwas. Ikaw ang akon dalangpan kag palanaguan. Ikaw ang nagaluwas sa akon sa mapintas nga mga tawo.

⁴Dalayawon ka, Ginoo, kay kon magpangayo ako sang bulig sa imo ginaluwas mo ako sa akon mga kaaway.

⁵Ang kamatayon daw pareho sa balod nga nagpalibot sa akon. Ang kalaglagan daw pareho sa mabaskog nga baha nga naglapaw sa akon.

⁶Ang kamatayon daw pareho man sa lubid nga nagburambod sa akon kag pareho sa siod sa akon alagyan.

⁷Sa akon kalisod nagpanawag ako sa imo, Ginoo. Nagpangayo ako sang bulig sa imo nga akon Dios, kag ginpamatian mo ang akon pangamuyo sa imo templo.

⁸Dayon naglinog, kag pati ang mga pundasyon sang mga bukid nag-uyog, tungod kay naakig ka, Ginoo.

⁹Nagguwa ang aso sa imo ilong, kag sa imo baba nagguwa ang makahalalit nga kalayo kag nagadabdab nga mga baga.

¹⁰Ginbuksan mo ang langit pareho sang pagbukas sang kurtina kag nagpanaog ka nga nagatungtong sa gal-om.

¹¹Nagsakay ka sa kerubin, kag madasig ini nga naglupad samtang ginapalid sang hangin.

¹²Ginhimo mo ang kadulom nga tabon sa imo palibot. Nagpanago ka sa madamol nga gal-om.

¹³Nagkirab sa imo atubangan, kag nagpangilat.

¹⁴Ang tingog mo Ginoo, nga Labing Mataas nga Dios, nagdaguob sa langit.

¹⁵Ginpana mo sang kilat ang imo mga kaaway kag nagpalalagyo sila nga nagasalasala.

¹⁶Sa imo nga pagsabdong kag puwerte nga kaakig nagakahubas ang dagat kag makita ang duta sa idalom sini, kag makita man ang pundasyon sang kalibutan.

¹⁷Halin sa langit gindawat mo ako kag ginkuha sa madalom nga tubig.

¹⁸Ginluwas mo ako sa akon gamhanan nga mga kaaway nga indi ko masarangan.

¹⁹Ginsalakay nila ako sang nalisdan ako, pero gin-apinan mo ako, Ginoo.

²⁰Gindala mo ako sa lugar nga wala sing katalagman; ginluwas mo ako kay nalipay ka sa akon.

²¹Ginapakamaayo mo ako tungod nga matarong ang akon kabuhi kag wala ako sing may nahimo nga sala.

²²Kay ginasunod ko ang imo mga pamaagi kag wala ako nagbiya sa imo.

²³Ginatuman ko ang tanan mo nga sugo kag wala ko ginalapas ang imo mga pagsulundan.

²⁴Nakahibalo ka nga wala sing kasawayan ang akon kabuhi kag ginalikawan ko nga makasala.

²⁵Ginapakamaayo mo ako tungod nga nakita mo nga matarong ang akon kabuhi kag wala ako sing may ginahimo nga sala.

²⁶Matutom ka sa mga matutom sa imo, kag maayo sa mga maayo man.

²⁷Sinsero ka sa mga sinsero sa imo, kag maayo magpadihot sa mga malaot.

²⁸Huo, ginaluwas mo ang mga mapainubuson, pero ginapaubos mo ang mga matinaas-taason.

²⁹Ginoo, ikaw ang akon kasanag. Sa kadulom ikaw ang akon suga.

³⁰Sa imo bulig masarangan ko nga salakayon ang panong sang mga soldado kag masarangan ko nga sakaon ang pader nga nagapalibot sa siyudad.

³¹Ang imo pamaagi, O Dios, wala sing sayop. Ang imo pulong masaligan gid. Pareho ka sa taming sa tanan nga nagapangayo sang proteksyon sa imo.

³²Ikaw lang, Ginoo, amo ang Dios; ikaw lang ang amon palalipdan nga bato.

³³Ikaw ang nagahatag sa akon sang kusog kag ang nagabantay sa akon dalanon.

³⁴Ginapabaskog mo ang akon tiil pareho sa tiil sang usa, agod maagwanta ko ang pagtaklad sa mataas nga mga lugar.

³⁵Ginahanas mo ako sa pagpakig-away, pareho abi sa pagbinat sa mabakod nga pana.

³⁶Ginaprotektaran mo ako pareho sa taming, gani luwas ang akon kabuhi. Paagi sa imo bulig nangin bantog ako.

³⁷Ginahatagan mo ako sang matawhay nga alagyan, gani wala nagakasandad ang akon mga tiil.

³⁸Ginlagas ko ang akon mga kaaway kag napierdi ko sila. Kag wala gid ako magbalik hasta nga nalaglag ko sila.

³⁹Ginlaglag ko gid sila kag natumba sila sa akon tiilan kag indi na sila makabangon pa.

⁴⁰Ginhatagan mo ako, Ginoo, sang kusog sa pagpakig-away kag ginpadaog sa akon mga kaaway.

⁴¹Ginpatal-as mo ang akon mga kaaway kag ginlaglag ko sila.

⁴²Nagpangayo sila sang bulig, pero wala sing may nagluwas sa ila. Nagpanawag sila sa imo, pero wala mo sila ginsabat.

⁴³Gindugmok ko sila hasta nga daw pareho na lang sila sa yab-ok. Gintasak-tasak ko sila nga daw sa lunang sa kalsada.

⁴⁴Ginluwas mo ako, Ginoo, sa akon rebelde nga katawhan. Ginhimo mo ako nga pangulo sang mga nasyon. Ang mga taga-iban nga lugar nagaalagad sa akon.

⁴⁵Nagaluhod sila sa akon sa kahadlok kag nagatuman dayon sang akon mando.

⁴⁶Nadulaan sila sang kaisog, gani nagaguwa sila sa ila mga palanaguan nga nagakurog sa kahadlok.

⁴⁷Buhi ka, Ginoo! Dalayawon ka nga akon palalipdan nga bato. Ginapakataas ko ikaw tungod nga ikaw ang Dios nga akon manluluwas.

⁴⁸Ginabalusan mo ang akon mga kaaway, kag ginapasakop mo ang mga nasyon sa akon.

⁴⁹Ginaluwas mo ako sa akon mapintas nga mga kaaway, kag ginapadaog mo ako sa ila.

⁵⁰Gani padunggan ko ikaw sa mga nasyon. Kantahan ko ikaw sang mga pagdayaw.

⁵¹Ginahatagan mo sang dalagko nga mga kadalag-an ang imo pinili nga hari. Ginahigugma mo si David kag ang iya mga kaliwat sa wala sing katapusan.”