Read Hiligaynon 1 Chronicles 16 Bible Online

1 Chronicles 16 - Hiligaynon bible

1 Chronicles 16

¹Ginbutang nila ang Kahon sang Dios sa sulod sang tolda nga ginpatindog ni David para sa sini nga Kahon. Dayon naghalad sila sa Ginoo sang mga halad nga ginasunog kag sang mga halad nga para sa maayo nga relasyon.

²Pagkatapos nila ni David halad sadto, ginbendisyunan niya ang mga tawo sa ngalan sang Ginoo.

³Dayon ginhatagan niya ang tagsa ka Israelinhon didto, lalaki kag babayi, sang tinapay, karne, kag mga pasas.

⁴Nagpili si David sang mga Levita sa pag-alagad sa atubangan sang Kahon sang Ginoo, sa pagpangamuyo, sa pagpasalamat kag sa pagdayaw sa Ginoo, ang Dios sang Israel.

⁵Si Asaf amo ang nagapanguna sa ila kag siya ang manugpatunog sang mga simbals. Ang sunod sa iya amo si Zacarias, dayon si Jiel, Shemiramot, Jehiel, Matitia, Eliab, Benaya, Obed Edom, kag Jiel. Sila ang mga manugtukar sang mga lira kag mga arpa.

⁶Ang mga pari nga si Benaya kag Jahaziel amo ang manugpatunog permi sang mga trumpeta sa atubangan sang Kahon sang Kasugtanan sang Dios.

⁷Ang Kanta ni David sa Pagpasalamat (Salmo 105:1-15; 96:1-13; 106:1, 47, 48) Sadto nga adlaw sa una nga tion, ginhatag ni David sa una nga tion kay Asaf kag sa iya kapareho nga mga Levita ang ini nga kanta sa pagpasalamat sa Ginoo:

⁸Pasalamati ninyo ang Ginoo; simbaha ninyo siya! Isugid sa mga katawhan ang iya mga binuhatan.

⁹Kantahi ninyo siya sang mga pagdayaw; isugid ang tanan nga makatilingala niya nga mga binuhatan.

¹⁰Dayawa ninyo ang iya pagkabalaan. Magkalipay kamo nga mga nagadangop sa iya.

¹¹Magsalig kamo sa Ginoo kag sa iya nga kusog. Magdangop kamo permi sa iya.

¹²Kamo nga mga pinili sang Dios kag mga kaliwat ni Israel nga alagad sang Dios, nga amo man si Jacob, dumduma ninyo ang iya makatilingala nga mga binuhatan, ang iya mga milagro, kag ang iya mga paghukom.

¹⁴Siya ang Ginoo nga aton Dios, kag nagahukom siya sa bug-os nga kalibutan.

¹⁵Ginadumdom niya permi ang iya kasugtanan. Indi gid niya pagkalimtan ang iya promisa hasta san-o.

¹⁶Ini nga kasugtanan ginhimo niya kay Abraham kag ginpromisa man niya kay Isaac.

¹⁷Ginpadayon niya ini nga kasugtanan kay Jacob, nga ginatawag man Israel, kag magapadayon ini nga kasugtanan hasta san-o.

¹⁸Nagsiling siya sa tagsa sa ila, “Ihatag ko sa imo ang duta sang Canaan bilang palanublion mo kag sang imo mga kaliwat.”

¹⁹Sadto anay diutay pa lang kaayo ang katawhan sang Dios, kag mga dumuluong pa lang sila sa duta sang Canaan.

²⁰Nagsaylo-saylo sila sa mga nasyon kag sa mga ginharian.

²¹Pero wala pagtuguti sang Dios nga daog-daugon sila. Para maproteksyunan sila, ginsabdong niya ang mga hari nga nagakontra sa ila. Siling niya,

²²“Indi ninyo pag-anha ang akon pinili nga mga alagad; indi ninyo paghaliti ang akon mga propeta.”

²³Kamo nga mga katawhan sa bug-os nga kalibutan, magkanta kamo sa Ginoo. Isugid ninyo adlaw-adlaw ang parte sa pagluwas niya sa aton.

²⁴Ibantala ninyo sa tanan nga katawhan sang mga nasyon ang iya pagkagamhanan kag ang iya makatilingala nga mga binuhatan.

²⁵Kay gamhanan ang Ginoo, kag takos gid nga dayawon. Dapat siya nga tahuron labaw sa tanan nga dios,

²⁶kay ang tanan nga dios sang iban nga mga nasyon ginhimo man lang nila agod ila simbahon, pero ang Ginoo amo ang naghimo sang kalangitan.

²⁷Ara sa iya ang pagkagamhanan kag pagkahalangdon; ang kusog kag kalipay ara sa iya puluy-an.

²⁸Dayawa ninyo ang Ginoo, kamo nga mga katawhan sang mga nasyon. Dayawa ninyo ang iya gahom kag kusog.

²⁹Dayawa ninyo ang iya pagkagamhanan kag magdala kamo sang halad sa iya presensya. Simbaha ninyo siya sa iya balaan nga presensya.

³⁰Magtahod kamo sa iya presensya, kamo nga mga katawhan sa bug-os nga kalibutan. Ginpahamtang niya sing malig-on ang kalibutan kag indi ini mauyog.

³¹Magkalipay ang kalangitan kag ang kalibutan. Magsugid sila sa mga nasyon, “Nagahari ang Ginoo.”

³²Magkalipay man sing tudo ang kadagatan, mga latagon, kag ang tanan nga ara sa ila.

³³Ang mga kahoy sa kagulangan magakanta sa kalipay sa presensya sang Ginoo. Kay magaabot siya sa paghukom sa mga tawo sa kalibutan.

³⁴Pasalamati ang Ginoo kay maayo siya; ang iya gugma wala sing katapusan.

³⁵Magpangamuyo kamo, “Luwasa kami, O Dios nga amon Manluluwas; hilwaya kami sa mga nasyon kag tipuna kami liwat sa amon duta agod makapasalamat kami kag makadayaw sa imo pagkabalaan.

³⁶Dalayawon ang Ginoo, ang Dios sang Israel, sa wala sing katapusan.” Dayon nagsabat ang tanan nga katawhan, “Amen.” Kag nagdayaw sila sa Ginoo.

³⁷Gintugyan ni David kay Asaf kag sa iya kapareho nga mga Levita ang pag-alagad permi sa atubangan sang Kahon sang Kasugtanan sang Ginoo, suno sa kinahanglan nga himuon kada adlaw.

³⁸Lakip sa sini nga grupo amo si Obed Edom nga anak ni Jedutun, si Hosa, kag ang 68 pa ka Levita, nga amo ang mga guwardya sang puwertahan sang Tolda.

³⁹Gintugyan ni David kay Zadok nga pari kag sa iya kapareho nga mga pari ang Tolda sang Ginoo didto sa mataas nga lugar sa Gibeon.

⁴⁰Sila permi ang maghalad sang mga halad nga ginasunog sa halaran, adlaw-gab-i, suno sa tanan nga nasulat sa Kasuguan sang Ginoo nga iya ginhatag sa Israel.

⁴¹Kaupod man nila si Heman, si Jedutum, kag ang iban nga ginpili sa pagkanta sang pagpasalamat sa Ginoo tungod sa iya gugma nga wala sing katapusan.

⁴²Responsibilidad ni Heman kag ni Jedutun ang pagpatunog sang mga trumpeta, mga simbals kag sang iban pa nga mga instrumento nga ginagamit sa pagkanta sang mga ambahanon para sa Ginoo. Ang mga anak ni Jedutun amo ang gintugyanan sa pagbantay sang puwertahan.

⁴³Dayon nagpauli ang tanan sa ila mga balay, kag si David nagpauli man sa pagbendisyon sang iya pamilya.