Read Hiligaynon Exodus 15 Bible Online

Exodus 15 - Hiligaynon bible

Exodus 15

¹Ang Kanta ni Moises Dayon nagkanta si Moises kag ang mga Israelinhon sang sini nga kanta sa Ginoo: “Kantahan ko ang Ginoo tungod kay nagmadinalag-on gid siya. Gintagbong niya sa dagat ang mga kabayo kag ang mga nagasakay sini.

²Ang Ginoo amo ang nagahatag sa akon sang kusog, kag siya ang akon ginakanta. Siya ang nagluwas sa akon. Siya ang akon Dios, kag pagadayawon ko siya. Siya ang Dios sang akon amay, kag padunggan ko siya.

³Ginoo ang iya ngalan, kag isa siya ka mangangaway.

⁴Gintagbong niya sa dagat ang mga karwahe kag mga soldado sang hari sang Egipto. Nagkalalumos sa Mapula nga Dagat ang mga pinakamaayo nga mga opisyal sang hari.

⁵Nagkalalumos sila sa madalom nga tubig; nagkalalugdang sila sa kadadalman pareho sa bato.

⁶Puwerte gid ang imo gahom, O Ginoo; paagi sini gindugmok mo ang mga kaaway.

⁷Sa imo pagkagamhanan, ginlaglag mo ang mga nagakontra sa imo. Ginpaagom mo sa ila ang imo kaakig nga amo ang naglaglag sa ila nga daw sa ginsunog sila nga dagami.

⁸Sa isa mo lang ka paghuyop naghawa ang tubig. Ang nagadaganas nga tubig naghawa kag nagtindog nga daw sa pader; daw sa nagtig-a ang madalom nga dagat.

⁹Nagsiling ang kaaway nga nagapabugal, ‘Lagson ko sila kag dakpon; partidahon ko ang ila mga manggad kag paayawan ko ang akon kaugalingon sini. Gabuton ko ang akon espada kag laglagon ko sila.’

¹⁰Pero sa isa mo lang ka paghuyop nalumos sila sa dagat. Naglugdang sila sa kadadalman pareho sa tingga.

¹¹O Ginoo, sin-o bala nga dios ang makapareho sa imo? Wala na sing pareho sa imo sa pagkabalaan kag pagkagamhanan. Ikaw lang ang Dios nga nagahimo sang makatilingala nga mga butang!

¹²Paagi sa imo gahom ginlamon sang duta ang amon mga kaaway.

¹³“Sa imo mapinadayunon nga gugma tuytuyan mo ang mga tawo nga imo ginluwas. Sa imo nga kusog tuytuyan mo sila sa imo balaan nga puluy-an.

¹⁴Mabatian ini sang mga nasyon kag magakurog sila sa kahadlok. Makulbaan gid ang mga Filistinhon.

¹⁵Ang mga pangulo sang Edom kag Moab magakulurog sa kahadlok, kag ang mga pangulo sang Canaan magakalalipong sa kahadlok.

¹⁶Huo, makulbaan gid sila. Paagi sa imo gahom magapahimuyong sila pareho sa bato, hasta makaagi ang imo katawhan nga imo ginluwas, O Ginoo.

¹⁷Pagadal-on mo ang imo katawhan sa imo duta, kag ipahamtang mo sila sa bukid nga imo ginapanag-iyahan— ang lugar nga ginhimo mo nga imo puluy-an, O Ginoo, ang templo nga ikaw mismo ang naghimo.

¹⁸Magahari ka, O Ginoo, sa wala sing katapusan.”

¹⁹Gintabunan sang Ginoo sang tubig ang mga kabayo sang hari sang Egipto kag ang iya mga karwahe kag mga manugkabayo pagkatapos tabok sang mga Israelinhon sa mamala nga duta sa tunga sang dagat.

²⁰Dayon si Miriam nga propeta kag utod ni Aaron nagkuha sang tamborin kag ginpangunahan niya ang mga babayi sa pagtukar sang tamborin kag pagsinaot.

²¹Nagkanta si Miriam sang sini nga kanta sa ila: “Kanta kamo sa Ginoo tungod kay nagmadinalag-on gid siya. Gintagbong niya sa dagat ang mga kabayo kag ang mga nagasakay sini.”

²²Ang Mapait nga Tubig Halin sa Mapula nga Dagat, gindala ni Moises ang mga Israelinhon sa kamingawan sang Shur. Sa sulod sang tatlo ka adlaw nagpanglakaton sila sa kamingawan kag wala sila sing may nakita nga tubig.

²³Sang nakaabot sila sa Mara, nakakita sila sang tubig, pero indi sila makainom tungod kay mapait ang tubig. (Amo ina nga gin-ngalanan ini nga lugar nga Mara.)

²⁴Tungod sini, nagreklamo ang mga Israelinhon kay Moises, “Ano na lang ang imnon ta?”

²⁵Gani nagpangayo sang bulig si Moises sa Ginoo, kag ginpakita sang Ginoo sa iya ang isa ka utod nga kahoy. Ginhaboy ini ni Moises sa tubig kag nagnamit ang tubig. Didto naghatag ang Ginoo sang sini nga pagsulundan kag sugo sa pagtilaw sang ila katutom sa iya:

²⁶“Kon magsunod kamo sing maayo sa akon, ang Ginoo nga inyo Dios, kag maghimo sing maayo sa akon panulok kag magtuman sang akon mga sugo kag mga pagsulundan, indi ko kamo pagpadal-an sang mga balatian pareho sa ginpadala ko sa mga Egiptohanon, kay ako ang Ginoo nga nagaayo sa inyo.”

²⁷Nakaabot sila sa Elim, nga sa diin may dose ka tuburan kag may 70 ka kahoy nga palma, kag nagkampo sila didto malapit sa tubig.