Read Hiligaynon Job 27 Bible Online

Job 27 - Hiligaynon bible

Job 27

¹Nagpadayon si Job sa paghambal,

²“Nagasumpa ako sa buhi nga Makagagahom nga Dios nga wala naghatag sa akon sang hustisya kag nagpalain sang akon buot.

³Samtang nagaginhawa pa ako, kag ginatugutan pa ako sang Dios nga mabuhi,

⁴indi gid ako maghambal sang kalautan kag indi gid ako magbutig.

⁵Indi ko gid pagbatunon nga husto kamo. Iinsister ko gid nga inosente ako hasta nga mapatay ako.

⁶Tindugan ko gid nga matarong ako, kag indi gid ako mag-untat. Samtang buhi ako limpyo ang akon konsensya.

⁷“Kabay pa nga ang mga nagakontra sa akon silutan sang Dios sang silot nga bagay sa malaot nga mga tawo.

⁸Kay ano bala ang paglaom sang indi diosnon nga tawo kon kuhaon na sang Dios ang iya kabuhi?

⁹Nagapamati bala ang Dios sa iya pagpangayo sang bulig kon ang katalagman magaabot sa iya?

¹⁰Malipay ayhan siya sa Makagagahom nga Dios? Magapanawag bala siya sa iya sa tanan nga tion?

¹¹“Tudluan ko kamo parte sa gahom sang Makagagahom nga Dios. Isugid ko gid sa inyo kon ano ang iya mga pamaagi.

¹²Pero kamo tanan nakakita sini. Ti, ngaa nagahambal pa kamo sa akon sang wala sing pulos?

¹³“Amo ini ang kapalaran nga gintalana sang Dios nga Makagagahom sa malaot kag mapintas nga mga tawo:

¹⁴Bisan madamo pa ang iya mga anak, ang iban sa ila mapatay sa inaway ukon sa gutom.

¹⁵Ang mabilin sa ila nga buhi mapatay sa balatian, kag wala sing may magpangasubo sa ila kamatayon, bisan ang ila mga asawa.

¹⁶“Bisan magtipon pa sang madamo gid nga pilak kag bayo ang malaot nga tawo,

¹⁷indi siya ang makapulos sini. Ang matarong kag inosente nga mga tawo ang magasuksok sang iya mga bayo, kag partidahon nila ang iya pilak.

¹⁸Ang ginapatindog niya nga balay pareho kagabok sa lawa sang damang ukon sang kamalig sang manugbantay sang talamnan.

¹⁹Magahigda siya nga manggaranon, pero pagbugtaw niya wala na ang tanan niya nga manggad.

²⁰Magaabot sa iya ang kahadlok nga daw sa mabaskog nga baha nga magaanod sa iya sa kagab-ihon.

²¹Paliron siya sang hangin nga halin sa sidlangan, kag madula siya sa iya ginaestaran.

²²Magahuyop ini sa iya nga wala sing luoy-luoy samtang nagatinguha gid siya sa pagpalagyo.

²³May magapamalakpak kag magapanagitsit sa pagyaguta sa iya tungod nga nadula siya sa iya ginaestaran.