Read Hiligaynon Psalms 10 Bible Online

Psalms 10 - Hiligaynon bible

Psalms 10

¹Pangamuyo para sa Bulig sang Dios Ginoo, ngaa bala kalayo sa imo? Ngaa bala nagapanago ka sa tion sang kalisod?

²Tungod sang pagkamatinaas-taason sang mga malaot, ginapaantos nila ang mga kubos. Kabay pa nga matabo sa ila mismo ang ila ginaplano nga malain sa iban.

³Kay ginapabugal nila ang ila malaot nga mga handom. Sila nga mga dalok nagapakamalaot kag nagayaguta sa imo, Ginoo.

⁴Tungod sang pagkahambog nila nga mga malaot, wala sila nagadangop sa imo. Wala gid sila nagahunahuna parte sa imo.

⁵Mauswagon sila permi, kag ginabaliwala lang nila ang imo paghukom. Ginahikayan pa nila ang tanan nila nga kaaway.

⁶Nagahunahuna sila nga indi gid sila matublag, kundi mangin malipayon sila permi kag wala sing malain nga matabo sa ila.

⁷Ang ila ginahambal pulos pagpasipala, binutig, kag pamahog. Nagahambal man sila sing malain nga mga pulong nga makahalit sa iban.

⁸Sa mga banwa nagahulat sila sa ila palanaguan nga nagabantay sa mga inosente nga magaagi agod patyon nila.

⁹Nagahulat sila nga nagapalipod pareho sa leon agod dakpon ang mga kubos, kag kon madakop na gani nila ginaguyod nila dayon.

¹⁰Paagi sa ila kusog ginadugmok nila ang mga makaluluoy hasta nga indi na ini makabangon.

¹¹Nagahunahuna sila nga wala nagasapak ang Dios kag wala nagatan-aw sa ila ginahimo.

¹²Sige na Ginoong Dios, siluti na ang mga malaot! Indi pagpabay-i ang mga kubos.

¹³O Dios, ngaa nga ginayaguta ka sang mga malaot? Nagasiling pa sila nga indi mo kuno sila pagsilutan.

¹⁴Pero nakita mo ang mga nagaantos kag ang mga nalisdan, kag handa ka sa pagbulig sa ila. Nagadangop sa imo ang mga makaluluoy nga pareho sa mga ilo, kag ginabuligan mo sila.

¹⁵Dulaa ang kusog sang malaot nga mga tawo. Siluti sila sa ila mga kalautan hasta nga untatan na nila ini.

¹⁶Ginoo, hari ka sa wala sing katapusan. Madula ang malaot nga mga nasyon sa kalibutan nga imo gintuga.

¹⁷Nabatian mo, Ginoo, ang pangamuyo sang mga kubos. Kag tungod nga ginapamatian mo sila, ginapalig-on mo sila.

¹⁸Ginapamatian mo sila nga mga ilo kag mga ginapigos, agod mahatagan sila sing hustisya, kag agod indi na sila pagpahugon sang tawo nga halin man lang sa duta.