Read Hiligaynon Psalms 102 Bible Online

Psalms 102 - Hiligaynon bible

Psalms 102

¹Pangamuyo sang Tawo nga Nagaantos Ginoo, pamatii ang akon pangamuyo. Pamatii ang akon pagpangayo sang bulig sa imo.

²Indi ka magpanago sa akon sa tion sang akon kalisod. Pamatii ako kon magpanawag ako sa imo, kag sabta ako gilayon.

³Kay ang akon kabuhi dali lang madula pareho sa aso; ang akon lawas daw sa ginasunog.

⁴Nagahugos ako pareho sa hilamon nga nagakalaya. Kag nadulaan ako sang gana magkaon

⁵tungod sang akon mabaskog nga pag-ugayong. Daw sa tul-an na lang ako nga ginputos sang panit.

⁶Nagaisahanon ako pareho sa ilahas nga pispis ukon pareho sa bukaw sa guba nga lugar nga wala sing may nagaestar nga tawo.

⁷Indi ako makatulog; pareho ako sa pispis nga nagaisahanon sa atop sang balay.

⁸Permi ako ginapakahuy-an sang akon mga kaaway. Ginayaguta nila ako kag ginagamit nila nga halimbawa ang akon malain nga kahimtangan sa pagsumpa sa iban.

⁹Ginayaguta nila ako kay wala na ako kaon-kaon kundi nagapungko na lang sa abo kag nagahilibion

¹⁰tungod sang imo puwerte nga kaakig sa akon. Ginayaguta man nila ako kay daw pareho ako sa basura nga ginpudyot mo kag ginhaboy.

¹¹Ang akon kabuhi pareho sa landong nga nagakadula. Kag pareho ako sa hilamon nga nagakalaya.

¹²Pero ikaw iya, Ginoo, nagahari sa wala sing katapusan; dumdumon ka sang mga tawo hasta san-o.

¹³Handa ka na nga kaluoyan ang Zion, tungod kay nag-abot na ang natalana nga tion nga ipakita mo ang imo kaayo sa iya.

¹⁴Kay ang ini nga siyudad, bisan wasak na, ginahigugma kag ginakabalak-an pa gihapon sang imo katawhan nga imo mga alagad.

¹⁵Ang mga nasyon magatahod sa Ginoo; ang tanan nga hari sa kalibutan magatahod sa iya nga gamhanan nga presensya.

¹⁶Kay patindugon liwat sang Ginoo ang Zion; ipakita niya ang iya gamhanan nga presensya.

¹⁷Pagasabton niya ang pangamuyo sang mga makaluluoy; indi niya pag-ibaliwala ang ila pangamuyo.

¹⁸Isulat ini para sa palaabuton nga mga henerasyon, agod nga magadayaw sila sa Ginoo:

¹⁹Ginatulok sang Ginoo ang kalibutan didto sa iya balaan nga lugar sa langit,

²⁰agod pamatian niya ang mga pag-ugayong sang iya katawhan nga ginbihag kag agod hilwayon niya ang iya katawhan nga palatyon.

²¹Kag tungod sini, ang mga ginhimo sang Ginoo ibantala sa Zion, ang siyudad sang Jerusalem, kag didto pagadayawon siya.

²²Matabo ini kon magtipon na ang mga katawhan halin sa mga nasyon kag mga ginharian sa pagsimba sa Ginoo.

²³Wala pa gani matapos ang akon kabuhi ginapaluya na ako sang Ginoo; ginapalip-ot niya ang akon kabuhi.

²⁴Gani nagsiling ako, “O Dios ko nga nagakabuhi sa wala sing katapusan, indi anay pagkuhaa ang akon kabuhi sa wala pa ako magtigulang.

²⁵Sang una gintuga mo ang kalibutan kag ang kalangitan.

²⁶Ini sila magakalawala, pero ikaw magapadayon sa gihapon. Magagabok sila tanan pareho sa bayo. Kag pareho man sa bayo, ilisan mo sila kag mawala sila.

²⁷Pero ikaw iya amo lang sa gihapon; wala ka sing katapusan.

²⁸Ang mga kaliwat sang imo katawhan nga imo mga alagad magakabuhi nga luwas sa katalagman kag bantayan mo sila.”