Read Hiligaynon Psalms 105 Bible Online

Psalms 105 - Hiligaynon bible

Psalms 105

¹Ang Dios kag ang Iya Katawhan (1 Cro. 16:8-22) Pasalamati ninyo ang Ginoo; simbaha ninyo siya! Isugid sa mga katawhan ang iya mga binuhatan.

²Kantahi ninyo siya sang mga pagdayaw; isugid ang tanan nga makatilingala niya nga mga binuhatan.

³Dayawa ninyo ang iya pagkabalaan. Magkalipay kamo nga mga nagadangop sa iya.

⁴Magsalig kamo sa Ginoo kag sa iya nga kusog. Magdangop kamo permi sa iya.

⁵Kamo nga mga pinili sang Dios kag mga kaliwat ni Abraham nga alagad sang Dios, kag mga kaliwat man ni Jacob, dumduma ninyo ang iya makatilingala nga mga binuhatan, ang iya mga milagro, kag ang iya mga paghukom.

⁷Siya ang Ginoo nga aton Dios, kag nagahukom siya sa bug-os nga kalibutan.

⁸Ginadumdom niya permi ang iya kasugtanan. Indi gid niya pagkalimtan ang iya promisa hasta san-o.

⁹Ini nga kasugtanan ginhimo niya kay Abraham kag ginpromisa man niya kay Isaac.

¹⁰Ginpadayon niya ini nga kasugtanan kay Jacob, nga ginatawag man Israel, kag magapadayon ini nga kasugtanan hasta san-o.

¹¹Nagsiling siya sa tagsa sa ila, “Ihatag ko sa imo ang duta sang Canaan bilang palanublion mo kag sang imo mga kaliwat.”

¹²Sadto anay diutay pa lang kaayo ang katawhan sang Dios, kag mga dumuluong pa lang sila sa duta sang Canaan.

¹³Nagsaylo-saylo sila sa mga nasyon kag sa mga ginharian.

¹⁴Pero wala pagtuguti sang Dios nga daog-daugon sila. Para maproteksyunan sila, ginsabdong niya ang mga hari nga nagkontra sa ila. Siling niya,

¹⁵“Indi ninyo pag-anha ang akon pinili nga mga alagad; indi ninyo paghaliti ang akon mga propeta.”

¹⁶Nagpadala ang Dios sang gutom sa duta sang Canaan. Gin-ubos niya kuha ang tanan nila nga pagkaon.

¹⁷Pero ginpauna na niya si Jose sa Egipto sa pagbulig sa ila. Ginbaligya didto si Jose bilang isa ka ulipon.

¹⁸Ginkadenahan ang iya mga tiil kag ginbutangan sang salsalon ang iya liog,

¹⁹hasta nga natabo ang iya gintagna. Ang mensahi sang Ginoo sa iya nga natuman nagpamatuod nga matarong siya.

²⁰Ginbuy-an siya sang hari sang Egipto nga nagadumala sa madamo nga katawhan,

²¹kag ginhimo niya siya nga manugdumala sang iya palasyo kag sang tanan niya nga pagkabutang.

²²Bilang manugdumala, may awtoridad siya sa pagdisiplina sa mga opisyal sang hari kag sa pagtudlo sa iya mga manuglaygay.

²³Sang ulihi nagkadto si Jacob kag ang iya panimalay sa Egipto, ang duta sang mga kaliwat ni Ham, kag didto sila nag-estar bilang mga dumuluong.

²⁴Ginpadamo sang Ginoo ang iya katawhan; mabudlay na sila pierdihon sang mga taga-Egipto nga ila mga kaaway.

²⁵Gintugutan sang Ginoo nga kontrahon kag tuntuhon sang mga taga-Egipto ang iya katawhan nga iya mga alagad.

²⁶Dayon ginpadala niya si Moises nga iya alagad kag si Aaron nga iya pinili.

²⁷Ginpakita nila didto sa duta sang mga kaliwat ni Ham ang makatilingala nga mga binuhatan sang Dios.

²⁸Ginpadulom sang Dios ang Egipto; pero nagsupak gihapon ang mga taga-Egipto sa iya mga sugo.

²⁹Ginhimo niya nga dugo ang ila mga tubig, gani nagkalamatay ang mga isda.

³⁰Napuno sang paka ang ila duta, bisan ang mga kuwarto sang ila mga pangulo.

³¹Sa pagmando sang Dios, napuno sang langaw kag lamok ang ila duta.

³²Imbes ulan, yelo kag kilat ang ginpadala niya sa ila duta.

³³Ginpamierde niya ang ila mga tanom nga ubas kag ang mga kahoy nga higera, kag ang iban pa nga mga kahoy.

³⁴Sa iya pagmando, nag-abot ang mga apan nga indi maisip.

³⁵Kag ginpangaon sini ang tanan nga tanom sa ila duta pati na ang ila mga patubas.

³⁶Ginpamatay sang Dios ang tanan nila nga kamagulangan nga lalaki.

³⁷Dayon ginpaguwa niya ang mga Israelinhon sa Egipto nga wala maano, kag may dala pa sila nga mga pilak kag mga bulawan.

³⁸Nalipay ang mga taga-Egipto sa paghalin sang mga Israelinhon, tungod kay nahadlok sila sa ila.

³⁹Sang paglakat sang mga Israelinhon, nagbutang ang Dios sang panganod sa paghandong sa ila kag sang kalayo sa paghatag sang kasanag sa ila sa kagab-ihon.

⁴⁰Nagpangayo sila sang pagkaon, kag ginpadal-an sila sang Dios sang mga pitaw, kag ginbusog niya sila sang pagkaon nga halin sa langit.

⁴¹Ginbuka niya ang bato kag nagsagawak ang tubig. Nag-ilig ini sa desierto nga daw sa suba.

⁴²Ginhimo ini tanan sang Dios kay wala niya ginkalimtan ang iya mismo promisa kay Abraham nga iya alagad.

⁴³Ginpaguwa niya sa Egipto ang katawhan nga iya ginpili, nga malipayon kag nagahinugyaw sa kalipay.

⁴⁴Kag ginhatag niya sa ila ang mga duta sang iban nga mga katawhan; ginpanubli nila ang ginpangabudlayan sang iban.

⁴⁵Ginhimo ini sang Dios agod tumanon nila ang iya mga pagsulundan kag kasuguan. Dayawa ang Ginoo.