Read Hiligaynon Psalms 108 Bible Online

Psalms 108 - Hiligaynon bible

Psalms 108

¹Pangamuyo para sa Bulig sang Dios (Salmo 57:7-11; 60:5-12) O Dios, nagasalig gid ako sa imo. Kantahan ko ikaw sang mga pagdayaw sa bug-os ko nga tagipusuon.

²Magabugtaw ako samtang nagapamanagbanag, kag ihanda ko ang akon mga instrumento nga may mga kuwerdas sa pagdayaw sa imo.

³Ginoo, dayawon ko ikaw sa tunga sang mga katawhan. Kantahan ko ikaw sa tunga sang mga taga-iban nga nasyon.

⁴Kay ang imo gugma kag katutom indi gid matakos; mas mataas pa ini sa kalangitan.

⁵Ipakita, O Dios, ang imo pagkagamhanan sa kalangitan kag sa bug-os nga kalibutan.

⁶Luwasa kami paagi sa imo gahom. Sabta ang akon pangamuyo agod maluwas kami nga imo mga hinigugma.

⁷O Dios, nagsiling ka didto sa imo templo, “Magadaog ako; bahinon ko ang Shekem kag ang Kapatagan sang Sucot kag ipanagtag sa akon katawhan.

⁸Akon ang Gilead subong man ang Manase. Ang Efraim amo ang akon manugdepensa kag ang Juda amo ang akon manugdumala.

⁹Ang Moab akon suluguon, kag ang Edom akon ginapanag-iyahan. Nagasinggit ako sang kadalag-an batok sa Filistia.”

¹⁰Sin-o ang magadala sa akon sa Edom kag sa siyudad sini nga napalibutan sang mga pader?

¹¹Indi bala ikaw, O Dios, nga nagsikway sa amon kag wala na nagaupod sa amon mga soldado?

¹²Buligi kami batok sa amon mga kaaway, kay wala sing pulos ang bulig sang tawo.

¹³Magadaog kami paagi sa imo bulig, O Dios, kay pierdihon mo ang amon mga kaaway.