Read Hiligaynon Psalms 109 Bible Online

Psalms 109 - Hiligaynon bible

Psalms 109

¹Ang Reklamo sang Tawo nga Ara sa Kalisod O Dios, nga akon ginadayaw, sabta ang akon pagpanawag sa imo.

²Kay ginaakusar ako sang malaot kag dayaon nga mga tawo. Nagahambal sila sang binutig parte sa akon.

³Permi nila ako ginahambalan sing malain bisan wala sing kabangdanan.

⁴Bisan nagapakig-abyan ako sa ila, ginakontra nila ako; pero ginapangamuyuan ko sila.

⁵Ginabalusan nila ako sing malain sa maayo nga ginahimo ko sa ila, kag ginabalusan nila ako sing kaakig sa akon pagpakig-abyan sa ila.

⁶Nagasiling sila, “Mangita kita sang malaot nga tawo nga magkontra kag mag-akusar sa iya sa korte.

⁷Kon hukman na siya, kabay pa nga magguwa nga may sala siya. Kag kabay pa nga ang iya pangamuyo kabigon nga sala.

⁸Kabay pa nga indi magdugay ang iya kabuhi kag ihatag na lang sa iban ang iya buluhaton.

⁹Kabay pa nga mapatay na siya agod mailo ang iya mga kabataan kag mabalo ang iya asawa.

¹⁰Kabay pa nga bisan diin na lang magkadto ang iya mga kabataan nga nagapakilimos, kag kabay pa nga palayason sila bisan sa ila guba nga elistaran.

¹¹Kabay pa nga kuhaon sang iya gin-utangan ang tanan niya nga pagkabutang, kag kabay pa nga kuhaon sang mga dumuluong ang iya pinangabudlayan.

¹²Kabay pa nga wala sing may maluoy sa iya kag sa iya ilo nga mga kabataan kon mapatay na siya.

¹³Kabay pa nga magkalamatay ang iya mga kaliwat agod malimtan na sila sa masunod nga henerasyon.

¹⁴Kabay pa nga indi pagpatawaron kag indi pagkalimtan sang Ginoo ang sala sang iya mga ginikanan kag mga katigulangan; kag kabay pa nga itugot sang Ginoo nga malimtan na sila sa kalibutan.

¹⁶Kay wala gid niya ginahunahuna ang paghimo sang maayo, kundi ginahingabot niya kag ginapamatay ang mga kubos, mga imol, kag mga nadulaan sang paglaom.

¹⁷Luyag niya nga pakamalauton ang iban—kabay pa nga sa iya ina matabo. Wala siya naluyag magbendisyon sa iban—kabay pa nga wala man sing may magbendisyon sa iya.

¹⁸Wala untat ang iya pagpakamalaot sa iban; daw bayo na ini nga iya ginasuksok. Kabay pa nga ang iya pagpakamalaot magabalik sa iya pareho sang pagsulod sang tubig sa iya lawas ukon pareho sang pagpanalupsop sang lana sa iya mga tul-an.

¹⁹Kag kabay pa nga magpabilin ini sa iya nga daw sa bayo nga nagatabon sa iya lawas ukon daw sa paha nga ginapaha niya permi.”

²⁰Ginoo, kabay pa nga amo ina ang imo isilot sa mga nagaakusar kag nagahambal sing malain sa akon.

²¹Pero buligi ako, Ginoong Dios, agod mapadunggan ka. Luwasa ako tungod sang imo kaayo kag gugma.

²²Kay kubos kag imol ako, kag nagasakit ang akon buot.

²³Nagaamat-amat na dula ang akon kabuhi pareho sa landong kon gab-i. Daw pareho ako sa apan nga ginkahig.

²⁴Nagaluya ang akon tuhod tungod sa pagpuasa. Puwerte na ako kaniwang.

²⁵Nangin talamayon ako sa akon mga kaaway. Nagalungo-lungo sila kon makita nila ako.

²⁶Buligi ako, Ginoo, nga akon Dios; luwasa ako suno sa imo gugma.

²⁷Ipahibalo sa akon mga kaaway nga ikaw, Ginoo, ang nagluwas sa akon.

²⁸Ginapakamalaot nila ako, pero ikaw magabendisyon sa akon. Mahuy-an sila kon salakayon nila ako, pero ako nga imo alagad magakalipay.

²⁹Sila nga nagaakusar sa akon matabunan sang kahuy-anan pareho sa bayo nga nagatabon sa lawas.

³⁰Pasalamatan ko gid ang Ginoo; dayawon ko siya sa atubangan sang madamo nga katawhan.

³¹Kay ginadepensahan niya ang mga tawo nga bululigan agod maluwas sila sa mga nagasentensya sa ila sang kamatayon.