Read Hiligaynon Psalms 111 Bible Online

Psalms 111 - Hiligaynon bible

Psalms 111

¹Pagdayaw sa Dios Dayawa ang Ginoo! Pasalamatan ko ang Ginoo sa bug-os ko nga tagipusuon sa pagtililipon sang matarong nga mga tawo.

²Gamhanan ang mga binuhatan sang Ginoo; ginapamalandungan ini sang tanan nga naluyag sini.

³Gamhanan kag halangdon ang mga binuhatan sang Dios, kag ang iya pagkamatarong nagapadayon sa wala sing katapusan.

⁴Ginapadumdom gid niya sa aton ang iya makatilingala nga mga binuhatan. Maayo siya kag maluluy-on;

⁵ginahatagan niya sang pagkaon ang mga nagatahod sa iya, kag ginadumdom niya permi ang iya kasugtanan.

⁶Ginapakita niya sa iya katawhan kon ano kagamhanan ang iya mga binuhatan, paagi sa paghatag sa ila sang mga duta sang iban nga mga nasyon.

⁷Matutom kag matarong siya sa tanan niya nga ginahimo, kag masaligan ang tanan niya nga mga sugo.

⁸Ining iya mga sugo nagapadayon sa wala sing katapusan, kag ginhatag niya ini nga may katutom kag pagkamatarong.

⁹Ginluwas niya ang iya katawhan, kag naghimo siya sang kasugtanan sa ila nga wala sing katapusan. Balaan siya kag makatilingala.

¹⁰Kon ang isa ka tawo gusto nga magmaalam, dapat magtahod siya sa Ginoo. Ang tanan nga nagatuman sang iya mga sugo may husto nga paghangop. Dalayawon siya sa wala sing katapusan.