Read Hiligaynon Psalms 112 Bible Online

Psalms 112 - Hiligaynon bible

Psalms 112

¹Bulahan ang Tawo nga Nagatahod sa Ginoo Dayawa ang Ginoo! Bulahan ang tawo nga nagatahod sa Ginoo kag nagakalipay gid sa pagtuman sang iya mga sugo.

²Mangin mauswagon ang iya mga anak, kay ang mga kaliwat sang mga tawo nga nagakabuhi sing husto pakamaayuhon sang Dios.

³Magamanggaranon ang iya pamilya, kag ang iya kaayo dumdumon hasta san-o.

⁴Bisan sa kadulom may kasanag gihapon para sa mga tawo nga nagakabuhi sing husto, maluluy-on, mabinalak-on, kag matarong.

⁵Pakamaayuhon ang tawo nga maalwan kag nagapahulam, kag wala nagadaya sa iya palangabuhian.

⁶Sigurado nga mangin malig-on ang iya kahimtangan hasta san-o kag indi siya malimtan hasta san-o.

⁷Wala siya nahadlok sa malain nga mga balita, kay malig-on ang iya balatyagon kag nagasalig siya sa Ginoo.

⁸Wala siya nagakatublag kag nagakahadlok kay sa ulihi makita niya nga mapierdi ang iya mga kaaway.

⁹Nagapanagtag siya sa mga imol; ang iya matarong nga ginahimo dumdumon hasta san-o kag ang iya ikasarang dugangan sang Dios bilang pagpadungog sa iya.

¹⁰Makita ini sang mga malaot kag magabagrot ang ila mga ngipon sa kaakig, kag daw matunaw sila sa kahuya. Ang ila mga plano indi magmadinalag-on.