Read Hiligaynon Psalms 115 Bible Online

Psalms 115 - Hiligaynon bible

Psalms 115

¹Isa lang gid ang Matuod nga Dios Ginoo, indi kami ang dapat padunggan kundi ikaw, tungod sang imo gugma kag katutom.

²Ngaa ginainsultuhan kami sang iban nga mga nasyon paagi sa pagsiling, “Diin na bala ang inyo Dios?”

³Ang amon Dios ara sa langit kag ginahimo niya ang bisan ano nga iya naluyagan.

⁴Pero ang ila mga dios-dios hinimo man lang sang tawo halin sa pilak kag bulawan.

⁵May mga baba ini, pero indi makahambal; may mga mata, pero indi makakita.

⁶May mga dulunggan, pero indi makabati; may mga ilong, pero indi makapanimaho.

⁷May mga kamot, pero indi makauyat; may mga tiil, pero indi makalakat, kag bisan tingog wala ka sing may mabatian.

⁸Ang nagahimo sang sini nga mga dios-dios kag ang tanan nga nagasalig sa ila mangin pareho man sa ila nga wala sing pulos.

⁹Kamo nga katawhan sang Israel, pati na kamo nga mga kaliwat ni Aaron, magsalig kamo sa Ginoo. Siya ang inyo manugbulig kag manugprotektar.

¹¹Kamo nga mga nagatahod sa Ginoo, magsalig kamo sa iya. Siya ang inyo manugbulig kag manugprotektar.

¹²Ginadumdom kita sang Ginoo, kag pakamaayuhon niya kita. Pakamaayuhon niya ang katawhan sang Israel pati na ang mga kaliwat ni Aaron.

¹³Pakamaayuhon niya ang tanan nga nagatahod sa iya, bantog man ukon indi.

¹⁴Kabay pa nga kamo kag ang inyo mga kaliwat padamuon sang Ginoo.

¹⁵Kabay pa nga pakamaayuhon kamo sang Ginoo nga nagtuga sang kalangitan kag sang kalibutan.

¹⁶Ang kalangitan iya sang Ginoo, pero ang kalibutan gintugyan niya sa mga tawo.

¹⁷Indi ang mga patay ang magadayaw sa Ginoo, kay indi na gani sila makatingog,

¹⁸kundi kita nga mga buhi amo ang magadayaw sa iya subong kag hasta san-o. Dayawa ang Ginoo!