Read Hiligaynon Psalms 116 Bible Online

Psalms 116 - Hiligaynon bible

Psalms 116

¹Ang Dios Nagaluwas sa Tawo sa Kamatayon Ginahigugma ko ang Ginoo, kay ginapamatian niya ang akon pagpangayo sang bulig sa iya.

²Tungod kay ginapamatian niya ako, indi ako mag-untat sa pagpanawag sa iya samtang nagakabuhi ako.

³Nahadlok ako kay nabatyagan ko nga daw dali na lang ako mapatay; ang kamatayon daw sa lubid nga nagaburambod sa akon. Natublag gid ako kag nabalaka,

⁴gani nagpanawag ako sa Ginoo, “Ginoo, luwasa ako!”

⁵Ang Ginoo nga aton Dios maayo, matarong, kag maluluy-on.

⁶Ginaprotektaran niya ang mga wala sing alam. Sang wala ako sing may mahimo ginluwas niya ako.

⁷Dapat magpakalig-on ako tungod kay maayo gid ang Ginoo sa akon,

⁸kay ginluwas niya ako sa kamatayon, sa kasubo kag sa kalaglagan.

⁹Gani magakabuhi ako nga malapit sa Ginoo diri sa kalibutan sang mga buhi.

¹⁰Nagatuo gihapon ako, bisan pa nga nagsiling ako, “Puwerte gid ang akon pag-antos.”

¹¹Sa akon kahadlok nagsiling ako, “Wala gid sing tawo nga masaligan.”

¹²Ano bala ang maibalos ko sa Ginoo sa tanan niya nga kaayo sa akon?

¹³Magasimba ako sa Ginoo kag magadala ako sang halad nga bino sa pagpasalamat sa iya sa pagluwas niya sa akon.

¹⁴Tumanon ko ang akon mga promisa sa iya sa presensya sang tanan niya nga katawhan.

¹⁵Nasakitan ang Ginoo kon may mapatay sa iya matutom nga katawhan.

¹⁶Ginoo, matuod nga alagad mo ako. Ginhilway mo ako sa pagkabihag.

¹⁷Magasimba ako sa imo kag magahalad ako sang halad nga bilang pagpasalamat sa imo.

¹⁸Tumanon ko ang akon mga promisa sa imo sa presensya sang tanan mo nga katawhan

¹⁹didto sa lagwerta sang imo templo sa Jerusalem. Dayawa ang Ginoo!