Read Hiligaynon Psalms 118 Bible Online

Psalms 118 - Hiligaynon bible

Psalms 118

¹Pagpasalamat tungod sang Pagdaog Pasalamati ang Ginoo, kay maayo siya; ang iya gugma wala sing katapusan.

²Magsiling ang katawhan sang Israel, “Ang iya gugma wala sing katapusan.”

³Magsiling ang mga kaliwat ni Aaron, “Ang iya gugma wala sing katapusan.”

⁴Magsiling ang mga nagatahod sa Ginoo, “Ang iya gugma wala sing katapusan.”

⁵Sa akon kalisod, nagpanawag ako sa Ginoo, kag ginsabat niya ako paagi sa paghilway sa akon.

⁶Kaupod ko ang Ginoo, gani indi ako mahadlok. Ano ang mahimo sang tawo sa akon?

⁷Kaupod ko ang Ginoo. Siya ang nagabulig sa akon, kag makita ko mismo ang pagkapierdi sang akon mga kaaway.

⁸Mas maayo nga magdangop sa Ginoo kaysa magsalig sa tawo.

⁹Mas maayo nga magdangop sa Ginoo kaysa magsalig sa gamhanan nga mga tawo.

¹⁰Ginlibutan ako sang madamo nga mga nasyon nga akon kaaway, pero ginpierdi ko sila paagi sa gahom sang Ginoo.

¹¹Matuod nga ginlibutan nila ako, pero ginpierdi ko sila paagi sa gahom sang Ginoo.

¹²Ginsalakay nila ako pareho sa panong sang putyukan, pero gintapna sila gilayon pareho sa ginasunog nga dagami nga nagakapatay dayon. Ginpierdi ko sila paagi sa gahom sang Ginoo.

¹³Ginsalakay ako sing mabaskog kag diutayan na lang ako madaog, pero ginbuligan ako sang Ginoo.

¹⁴Ang Ginoo amo ang nagahatag sa akon sang kusog kag siya ang akon ginakanta. Siya ang nagluwas sa akon.

¹⁵Pamatii ang paghinugyaw sang katawhan sang Dios sa ila mga tolda tungod sang ila pagdaog: “Ini nga kadaugan ginhimo sang Ginoo paagi sa iya gahom! Ang gahom sang Ginoo amo ang nagpadaog sa aton!”

¹⁷Indi ako mapatay, kundi magakabuhi, kag ipanugid ko ang mga ginhimo sang Ginoo.

¹⁸Bisan pa nga puwerte gid ang silot sang Ginoo sa akon, wala niya pagtuguti nga mapatay ako.

¹⁹Buksi ang mga puwertahan sang templo sang Ginoo para sa akon, kay magasulod ako kag magapasalamat sa Ginoo.

²⁰Amo ini ang puwertahan sang Ginoo nga sa diin ang mga matarong lang ang makasulod.

²¹Magapasalamat ako sa imo, Ginoo, kay ginsabat mo ang akon pangamuyo. Ikaw ang nagluwas sa akon.

²²Ang bato nga ginsikway sang mga panday amo ang nangin pundasyon nga bato.

²³Ang Ginoo ang naghimo sini kag makatilingala ini sa aton.

²⁴Amo ini ang adlaw nga ginpadaog kita sang Ginoo, gani magkalipay kag magsinadya kita.

²⁵Ginoo, padayon ka nga magluwas sa amon. Hatagi kami sang kadalag-an sa amon mga ginahimo.

²⁶Ginapakamaayo sang Ginoo ang iya pinadala. Kag kamo nga mga tawo, kabay pa nga pakamaayuhon man kamo sang Ginoo halin diri sa iya templo.

²⁷Ang Ginoo, Dios; kag maayo gid siya sa aton. Magdala kita sang mga sanga sang kahoy sa pagselebrar sang piesta, kag maglibot kita sa halaran.

²⁸Ginoo, ikaw ang akon Dios; nagapasalamat ako kag nagadayaw sa imo.

²⁹Pasalamati ang Ginoo, kay maayo siya; ang iya gugma wala sing katapusan.