Read Hiligaynon Psalms 119 Bible Online

Psalms 119 - Hiligaynon bible

Psalms 119

¹Ang Kasuguan sang Dios Bulahan ang mga tawo nga wala kasawayan ang ila kabuhi, nga nagakabuhi suno sa kasuguan sang Ginoo.

²Bulahan ang mga tawo nga nagasunod sa mga pagpanudlo sang Dios, nga nagatuman sa iya sa ila bug-os nga tagipusuon.

³Wala sila nagahimo sang malain kundi nagasunod sila sa mga pamaagi sang Dios.

⁴Ginoo, ginhatag mo sa amon ang imo mga pagsulundan agod tumanon namon ini nga may katutom.

⁵Dako gid ang akon handom nga mangin matutom ako sa pagtuman sang imo mga pagsulundan.

⁶Kon tumanon ko ang tanan mo nga mga sugo, indi ako mahuy-an.

⁷Dayawon ko ikaw nga may matinlo nga tagipusuon samtang nagatuon ako sang imo matarong nga mga sugo.

⁸Tumanon ko ang imo mga pagsulundan, gani indi gid ako pagpabay-i.

⁹Ano bala ang himuon sang isa ka pamatan-on agod mangin matinlo ang iya kabuhi? Ang iya himuon amo ang pagsunod sa imo pulong.

¹⁰Nagadangop ako sa imo sa bug-os ko nga tagipusuon, gani indi pag-itugot nga talikdan ko ang imo mga sugo.

¹¹Ginatipigan ko ang imo pulong sa akon tagipusuon agod indi ako makasala sa imo.

¹²Dalayawon ikaw, Ginoo! Tudlui ako sang imo mga pagsulundan.

¹³Ginasulit-sulit ko hambal ang tanan nga sugo nga imo ginhatag.

¹⁴Nagakalipay ako sa pagsunod sang imo mga pagpanudlo, labaw pa sa kalipay nga ginahatag sang manggad.

¹⁵Nagapamalandong ako sa imo mga pagsulundan kag ginahunahuna ko sing maayo ang imo mga pamaagi.

¹⁶Nagakalipay ako sa imo mga pagsulundan kag indi ko pagkalimtan ang imo pulong.

¹⁷Magmaayo ka sa akon nga imo alagad agod padayon ako nga magkabuhi kag magtuman sang imo pulong.

¹⁸Buksi ang akon hunahuna agod nga maintiendihan ko ang matahom nga mga kamatuoran sa imo kasuguan.

¹⁹Umalagi lang ako sa sining kalibutan, gani ipahayag sa akon ang imo mga sugo.

²⁰Sa tanan nga tion nagahandom gid ako sa paghibalo sang imo mga sugo.

²¹Ginasabdong mo ang mga bugalon, nga imo ginapakamalaot. Ini sila nagatalikod sa imo mga sugo.

²²Ilikaw ako sa ila nga pagpakahuya kag pagyaguta, kay ginatuman ko ang imo mga pagpanudlo.

²³Bisan pa magtipon ang mga manugdumala sa paglibak sa akon, ako nga imo alagad magapamalandong sa imo mga pagsulundan.

²⁴Ang imo mga pagpanudlo nagahatag sa akon sang kalipay; amo ini ang akon manuglaygay.

²⁵Daw mapatay na ako, gani padayuna ang akon kabuhi suno sa imo promisa.

²⁶Ginsugid ko sa imo ang parte sa akon kabuhi kag ginpamatian mo ako. Tudlui ako sang imo mga pagsulundan.

²⁷Paintiendiha ako sang imo mga pagsulundan agod mapamalandungan ko ang imo makatilingala nga mga binuhatan.

²⁸Daw malumos ako sa kasubo, gani pabaskuga ako suno sa imo promisa.

²⁹Buligi ako nga indi maghimo sang malain; kag kaluoyi ako nga matuman ko ang imo kasuguan.

³⁰Ginpili ko ang husto nga dalan; gusto ko gid nga magsunod sa imo mga sugo.

³¹Ginasunod ko gid, Ginoo, ang imo mga pagpanudlo, gani indi pag-itugot nga mahuy-an ako.

³²Ginatinguhaan ko gid ang pagtuman sang imo mga sugo tungod kay ginadugangan mo ang akon pag-intiendi.

³³Tudlui ako, Ginoo, sang imo mga pagsulundan, kag pagatumanon ko ini hasta san-o.

³⁴Hatagi ako sang pag-intiendi sa imo kasuguan, kag sundon ko ini kag tipigan sa bug-os ko nga tagipusuon.

³⁵Tuytuyi ako sa pagsunod sang imo mga sugo, kay sa sini may kalipay ako.

³⁶Hatagi ako sang handom sa pagtuman sang imo mga pagpanudlo sang sa paghandom nga magmanggaranon.

³⁷Ilikaw ako sa paghandom sang mga butang nga wala sing pulos. Padayuna ang akon kabuhi suno sa imo promisa.

³⁸Tumana ang imo promisa sa akon nga imo alagad, nga ginapromisa mo sa mga nagatahod sa imo.

³⁹Kuhaa ang mga pagpakahuya sa akon nga akon ginakahadlukan kay ginakabig ko nga maayo ang imo mga sugo.

⁴⁰Luyag ko nga magtuman sang imo mga pagsulundan. Tungod nga ikaw matarong, padayuna ang akon kabuhi.

⁴¹Ginoo, ipakita ang imo paghigugma kag pagluwas sa akon, suno sa imo promisa.

⁴²Dayon masabat ko ang mga nagapakahuya sa akon, kay nagasalig ako sa imo mga pulong.

⁴³Pahambala ako sang imo matuod nga mga pulong sa tanan nga tion, kay ang akon paglaom ara lamang sa imo mga sugo.

⁴⁴Permi ko tumanon ang imo kasuguan hasta san-o.

⁴⁵Magakabuhi ako nga may kahilwayan, kay nagatinguha gid ako sa pagtuman sang imo nga pagsulundan.

⁴⁶Indi ako magkahuya sa pagsugid sang imo mga pagpanudlo bisan pa sa mga hari.

⁴⁷Nagakalipay gid ako sa pagsunod sa imo mga sugo nga akon ginahigugma.

⁴⁸Ginatahod ko ang imo mga sugo nga akon ginahigugma, kag ginapamalandungan ko ang imo mga pagsulundan.

⁴⁹Dumduma ang imo promisa sa akon nga imo alagad, kay sa sina ginahatagan mo ako sang paglaom.

⁵⁰Ang imo promisa nagapabuhi sa akon kag nagahatag sa akon sang kalipay sa akon mga pag-antos.

⁵¹Puwerte gid ang paghikay sa akon sang mga bugalon, pero wala ako nagabiya sa imo kasuguan.

⁵²Ginoo, ginadumdom ko ang imo mga sugo nga dugay na nimo nga ginhatag, kay nagahatag ini sa akon sang kalipay.

⁵³Akig gid ako katama tungod sa mga malaot, nga nagasikway sang imo kasuguan.

⁵⁴Nagakanta ako parte sa imo mga pagsulundan bisan diin ako mag-estar.

⁵⁵Ginoo, sa kagab-ihon ginadumdom ko ikaw kag ang imo kasuguan, kon paano ko ini matuman.

⁵⁶Amo ini ang akon kalipay: ang pagsunod sa imo mga pagsulundan.

⁵⁷Ikaw lang gid Ginoo ang akon kinahanglan. Nagapromisa ako sa pagtuman sang imo mga pulong.

⁵⁸Ginapangabay ko ikaw sa bug-os ko nga tagipusuon nga kaluoyan mo ako suno sa imo promisa.

⁵⁹Ginhunahuna ko kon paano ako nagkabuhi, kag nagdesisyon ako nga magsunod sa imo mga pagpanudlo.

⁶⁰Ginatuman ko gilayon ang imo mga sugo.

⁶¹Bisan pa ginagapos ako sang mga malaot, wala ko ginakalimtan ang imo kasuguan.

⁶²Bisan pa sa tungang gab-i nagamata ako sa pagpasalamat sa imo tungod sang imo matarong nga mga sugo.

⁶³Abyan ako sang tanan nga nagatahod sa imo kag nagatuman sang imo mga pagsulundan.

⁶⁴Ginoo, ginahigugma mo ang tanan nga tawo sa kalibutan. Tudlui ako sang imo mga pagsulundan.

⁶⁵Ginoo, magmaayo ka sa akon nga imo alagad, suno sa imo promisa.

⁶⁶Hatagi ako sang kaalam kag ihibalo kay nagasalig ako sa imo mga sugo.

⁶⁷Sang una, sang wala mo pa ako pagdisiplinaha, nagbiya ako sa imo, pero subong ginatuman ko na ang imo pulong.

⁶⁸Maayo ka gid kag maayo ang imo mga ginahimo. Tudlui ako sang imo mga pagsulundan.

⁶⁹Bisan ginabutang-butangan ako sang mga bugalon, ginatuman ko gihapon ang imo mga pagsulundan sa bug-os ko nga tagipusuon.

⁷⁰Ina nga mga bugalon wala sing pag-intiendi sa imo kasuguan, pero ako iya nagakalipay sa pagsunod sini.

⁷¹Maayo nga ginsilutan mo ako, kay paagi sini nakatuon ako sang imo mga pagpanudlo.

⁷²Para sa akon, ang kasuguan nga imo ginhatag mas bilidhon pa sang sa madamo gid nga manggad.

⁷³Gintuga mo ako kag ginporma; hatagi ako sang pag-intiendi agod makatuon ako sang imo mga sugo.

⁷⁴Nagakalipay ang mga nagatahod sa imo kon makita nila ako, kay nagasalig ako sa imo pulong.

⁷⁵Nakahibalo ako, Ginoo, nga matarong ang imo mga sugo. Kag tungod nga matutom ka, gindisiplina mo ako.

⁷⁶Kabay pa nga lipayon mo ako sang imo gugma suno sa imo promisa sa akon nga imo alagad.

⁷⁷Kaluoyi ako agod padayon ako nga magakabuhi; kay nagakalipay ako sa pagsunod sa imo kasuguan.

⁷⁸Kabay pa nga mahuy-an ang mga bugalon tungod kay ginabutang-butangan nila ako. Kon sa akon, magapamalandong ako sa imo mga pagsulundan.

⁷⁹Kabay pa nga magpalapit sa akon ang mga nagatahod sa imo kag nakahibalo sang imo mga pagpanudlo.

⁸⁰Kabay pa nga tumanon ko sa bug-os ko nga tagipusuon ang imo mga pagsulundan agod indi ako mahuy-an.

⁸¹Ginakapoy na ako sa paghulat sang imo pagluwas sa akon, pero nagasalig ako sa imo pulong.

⁸²Nagapalangdulom na ang akon panulok sing hulat sa imo promisa. Nagapamangkot ako, “San-o mo pa bala ako pabaskugon kag lipayon?”

⁸³Bisan pa pareho na ako sa indi na mapuslan nga panit nga suludlan sang bino, wala ko ginakalimtan ang imo mga pagsulundan.

⁸⁴Hasta san-o pa bala ang akon paghulat? San-o mo pa bala silutan ang mga nagahingabot sa akon nga imo alagad?

⁸⁵Nagkutkot sang mga buho sa pagsiod sa akon ang mga bugalon nga wala nagasunod sa imo kasuguan.

⁸⁶Masaligan gid ang tanan mo nga mga sugo. Buligi ako, kay ginahingabot ako sang mga tawo bisan wala sing kabangdanan.

⁸⁷Diutayan na lang ako nila mapatay, pero wala ko ginsikway ang imo mga pagsulundan.

⁸⁸Tipigi ang akon kabuhi suno sa imo gugma; tumanon ko ang pagpanudlo nga ginhatag mo.

⁸⁹Ginoo, ang imo pulong magapadayon sa wala sing katapusan; malig-on ini pareho sa langit.

⁹⁰Ang imo katutom nagapadayon hasta san-o. Ginpahamtang mo sing malig-on ang kalibutan, gani nagapabilin ini.

⁹¹Ang tanan nga butang nagapabilin hasta subong tungod sa imo pagbuot. Kay ini sila nagaalagad sa imo.

⁹²Kon ang imo kasuguan wala nagalipay sa akon, kuntani napatay na ako tungod sang akon pag-antos.

⁹³Indi ko gid pagkalimtan ang imo mga pagsulundan, kay paagi sini ginapadayon mo ang akon kabuhi.

⁹⁴Imo ako, gani luwasa ako! Kay nagatinguha gid ako sa pagtuman sang imo mga pagsulundan.

⁹⁵Nagahulat ang mga malaot sa pagpatay sa akon, pero pamalandungan ko ang imo mga pagpanudlo.

⁹⁶Nakita ko nga ang tanan nga butang may limitasyon, pero ang imo mga sugo wala.

⁹⁷Daw ano ang paghigugma ko sang imo kasuguan. Ginapamalandungan ko gid ini permi.

⁹⁸Kag tungod nga ari sa akon permi ang imo mga sugo, mas maalam ako sang sa akon mga kaaway.

⁹⁹Madamo pa ang akon naintiendihan sang sa akon mga manunudlo, kay ang imo pagpanudlo amo ang akon ginapamalandungan.

¹⁰⁰Labaw pa ang akon pag-intiendi sang sa mga tigulang, kay ginatuman ko ang imo mga pagsulundan.

¹⁰¹Ginalikawan ko ang tanan nga malain nga pagginawi agod matuman ko ang imo pulong.

¹⁰²Wala ako nagbiya sa imo mga sugo, kay ikaw ang nagatudlo sa akon.

¹⁰³Daw ano katam-is sang imo mga promisa, mas matam-is pa ini sang sa dugos.

¹⁰⁴Nagakuha ako sing pag-intiendi halin sa imo mga pagsulundan, gani ginakaugtan ko ang tanan nga malain nga buhat.

¹⁰⁵Ang imo pulong pareho sa suga nga nagahatag kasanag sa akon alagyan.

¹⁰⁶Tumanon ko gid ang akon ginsumpa nga magsunod sa imo matarong nga mga sugo.

¹⁰⁷Puwerte gid ang akon pag-antos; padayuna ang akon kabuhi, Ginoo, suno sa imo promisa.

¹⁰⁸Batuna, Ginoo, ang akon kinabubut-on nga pagdayaw sa imo, kag tudlui ako sang imo mga sugo.

¹⁰⁹Bisan pa ara ako permi sa peligro sang kamatayon, wala ko ginakalimtan ang imo kasuguan.

¹¹⁰Nagbutang sang siod para sa akon ang mga malaot, pero wala ako magbiya sa imo mga pagsulundan.

¹¹¹Ang imo mga pagpanudlo amo ang akon bilidhon nga pagkabutang sa wala sing katapusan, kay amo ini ang akon kalipay.

¹¹²Nagdesisyon ako nga tumanon ko gid ang imo mga pagsulundan hasta san-o.

¹¹³Ginakaugtan ko ang mga tawo nga indi mainunungon sa imo, pero ginahigugma ko ang imo kasuguan.

¹¹⁴Ikaw ang akon palanaguan kag manugprotektar; nagasalig ako sa imo pulong.

¹¹⁵Palayo kamo sa akon, kamo nga mga nagahimo sing malain, agod matuman ko ang mga sugo sang akon Dios.

¹¹⁶Hatagi ako sang kusog suno sa imo promisa agod padayon ako nga magakabuhi; kag indi pag-itugot nga mapaslawan ako sa akon paglaom sa imo.

¹¹⁷Buligi ako agod maluwas ako; kag isentro ko permi ang akon hunahuna sa imo mga pagsulundan.

¹¹⁸Ginasikway mo ang tanan nga nagabiya sa imo mga pagsulundan. Sa pagkamatuod, ang ila pagpanunto wala sing pulos.

¹¹⁹Ginakabig mo nga pareho sa basura ang tanan nga malaot nga mga tawo diri sa kalibutan. Tungod sini ginahigugma ko ang imo pagpanudlo.

¹²⁰Nagakurog ako sa kahadlok sa imo; nahadlok gid ako sa imo paghukom.

¹²¹Ginhimo ko ang matarong kag husto, gani indi ako pagpabay-i sa akon mga kaaway.

¹²²Magpromisa ka nga buligan mo ako nga imo alagad; indi pag-itugot nga piguson ako sang mga bugalon.

¹²³Nagapalangdulom na ang akon panulok sing hulat sa imo promisa nga luwason mo ako.

¹²⁴Himua sa akon nga imo alagad ang suno sa imo paghigugma, kag tudlui ako sang imo mga pagsulundan.

¹²⁵Alagad mo ako, gani hatagi ako sing pag-intiendi agod maintiendihan ko ang imo mga pagpanudlo.

¹²⁶Ginoo, tion na ini nga maghulag ka, kay wala na nagasunod ang mga tawo sa imo kasuguan.

¹²⁷Tungod nga ginahigugma ko ang imo mga sugo labaw pa sa bulawan, bisan pa sa pinakapuraw nga bulawan,

¹²⁸kag tungod nga ginasunod ko ang tanan mo nga pagsulundan, ginakaugtan ko ang tanan nga malain nga buhat.

¹²⁹Maayo gid ang imo mga pagpanudlo, gani ginasunod ko ini sa bug-os ko nga tagipusuon.

¹³⁰Ang pagpahayag sang imo mga pulong nagahatag sang kasanag sa hunahuna sang mga tawo kag kaalam sa mga wala sing alam.

¹³¹Puwerte gid ang akon handom sa imo mga sugo.

¹³²Talupangda ako kag kaluoyi, pareho sang imo ginahimo permi sa mga nagahigugma sa imo.

¹³³Tuytuyi ako paagi sa imo pulong; indi pag-itugot nga gamhan ako sang kalautan.

¹³⁴Luwasa ako sa mga nagapigos sa akon agod matuman ko ang imo mga pagsulundan.

¹³⁵Ipakita ang imo kaayo sa akon nga imo alagad, kag tudlui ako sang imo mga pagsulundan.

¹³⁶Puwerte gid ang akon hilibion tungod kay wala nagtuman ang mga tawo sa imo kasuguan.

¹³⁷Matarong ka, Ginoo, kag husto ang imo mga sugo.

¹³⁸Matarong kag masaligan gid ang mga pagpanudlo nga ginhatag mo.

¹³⁹Puwerte gid ang akon kaakig kay ginasikway sang akon mga kaaway ang imo mga pulong.

¹⁴⁰Napamatud-an nga masaligan gid ang imo promisa, kag ini ginahigugma ko nga imo alagad.

¹⁴¹Bisan kubos ako kag ginahikayan, wala ko ginakalimtan ang imo mga pagsulundan.

¹⁴²Wala sing katapusan ang imo pagkamatarong kag matuod ang imo kasuguan.

¹⁴³Nag-abot sa akon ang kalisod kag kasakit, pero ang imo mga sugo naghatag sa akon sang kalipay.

¹⁴⁴Matarong ang imo mga pagpanudlo sa wala sing katapusan. Hatagi ako sang pag-intiendi sa imo mga pagpanudlo agod padayon ako nga magakabuhi.

¹⁴⁵Nagapanawag ako sa imo, Ginoo, sa bug-os ko nga tagipusuon; sabta ako, kag pagatumanon ko ang imo mga pagsulundan.

¹⁴⁶Nagapanawag ako sa imo; luwasa ako, kag pagatumanon ko ang imo mga pagpanudlo.

¹⁴⁷Nagabugtaw ako sa wala pa magbutlak ang adlaw kag nagapangayo ako sang bulig sa imo. Nagasalig ako sa imo promisa.

¹⁴⁸Nagapulaw ako sa bilog nga gab-i sa pagpamalandong sang imo mga promisa.

¹⁴⁹Pamatii ako, Ginoo, suno sa imo gugma; padayuna ang akon kabuhi suno sa imo nga paghukom.

¹⁵⁰Nagapalapit sa akon ang mga malaot nga nagahingabot sa akon, nga nagasikway sang imo kasuguan.

¹⁵¹Pero malapit ka sa akon, Ginoo; kag masaligan ang tanan mo nga mga sugo.

¹⁵²Sa akon nga pagtuon sang imo mga pagpanudlo, dugay na nga nahibaluan ko nga ang ining imo mga pagpanudlo ginhimo mo nga magpadayon sa wala sing katapusan.

¹⁵³Tan-awa bala ang akon pag-antos kag luwasa ako, kay wala ko ginkalimtan ang imo kasuguan.

¹⁵⁴Depensahi ako sa mga nagaakusar sa akon kag luwasa ako; padayuna ang akon kabuhi suno sa imo promisa.

¹⁵⁵Indi maluwas ang mga malaot, kay wala sila nagatinguha sa pagtuman sang imo mga pagsulundan.

¹⁵⁶Dako ang imo kaluoy, Ginoo; padayuna ang akon kabuhi suno sa imo nga paghukom.

¹⁵⁷Madamo nga mga kaaway ang nagahingabot sa akon, pero wala gid ako magbiya sa imo mga pagpanudlo.

¹⁵⁸Ginakangil-aran ko ang mga indi matutom sa imo, kay wala nila ginatuman ang imo pulong.

¹⁵⁹Tan-awa, Ginoo, kon daw ano ang akon paghigugma sa imo mga pagsulundan. Padayuna ang akon kabuhi suno sa imo gugma.

¹⁶⁰Matuod ang tanan mo nga pulong, kag wala sing katapusan ang tanan mo nga matarong nga mga sugo.

¹⁶¹Ginahingabot ako sang mga manugdumala bisan wala sing kabangdanan, pero ang akon tagipusuon nagatahod gid sa imo pulong.

¹⁶²Nagakalipay ako sa imo promisa pareho sa isa ka tawo nga nakakita sang dako nga manggad.

¹⁶³Ginakaugtan ko kag ginakangil-aran ang kabutigan, pero ginahigugma ko ang imo kasuguan.

¹⁶⁴Makapila ako magdayaw sa imo sa isa ka adlaw, tungod sang imo matarong nga mga sugo.

¹⁶⁵Makaangkon sang maayo gid nga kahimtangan ang mga nagahigugma sang imo kasuguan, kag wala sing may makalaglag sa ila.

¹⁶⁶Nagalaom ako nga imo ako luwason, Ginoo, kag nagasunod ako sa imo mga sugo.

¹⁶⁷Dako gid ang akon paghigugma sa imo mga pagpanudlo, gani ginatuman ko gid ini.

¹⁶⁸Nahibaluan mo ang tanan ko nga ginahimo, gani ginatuman ko ang imo mga pagsulundan kag mga pagpanudlo.

¹⁶⁹Ginoo, kabay pa nga pamatian mo ang akon pagpanawag sa imo. Hatagi ako sang pag-intiendi suno sa imo promisa.

¹⁷⁰Kabay pa nga pamatian mo ang akon pangamuyo. Luwasa ako suno sa imo promisa.

¹⁷¹Magadayaw ako permi sa imo, kay gintudluan mo ako sang imo mga pagsulundan.

¹⁷²Magakanta ako parte sa imo pulong, kay matarong ang tanan mo nga mga sugo.

¹⁷³Kabay pa nga handa ka permi sa pagbulig sa akon, kay ginpili ko ang pagtuman sang imo mga pagsulundan.

¹⁷⁴Nagahandom ako nga luwason mo ako, Ginoo. Ang imo kasuguan nagahatag sa akon sang kalipay.

¹⁷⁵Padayuna ang akon kabuhi agod madayaw ko ikaw, kag kabay pa nga magbulig sa akon ang imo mga sugo.

¹⁷⁶Nagtalang ako pareho sa nadula nga karnero, gani pangitaa ako nga imo alagad kay wala ko ginkalimtan ang imo mga sugo.