Read Hiligaynon Psalms 12 Bible Online

Psalms 12 - Hiligaynon bible

Psalms 12

¹Pangamuyo para sa Bulig sang Dios Ginoo, buligi ako, kay wala na sing may nabilin nga matutom kag masaligan.

²Halos ang tanan nagabutig sa ila isigkatawo. Ginadayaw-dayaw nila ang iban agod dayaan.

³Ginoo, kabay pa nga pahipuson mo ang mga nagadayaw-dayaw sa iban kag ang mga nagapahambog

⁴nga nagasiling, “Mangin madinalag-on kami paagi sa amon paghambal. Pagusto kami kon ano ang amon ihambal, kag wala sing may makapauntat sa amon.”

⁵Nagasiling ang Ginoo, “Buligan ko ang mga kubos tungod kay ginapigos sila kag nagaugayong sila sa pag-antos. Protektaran ko sila kay amo ini ang ginahandom nila.”

⁶Masaligan gid ang mga promisa sang Ginoo. Pareho ini sang pilak nga masaligan gid nga puro tungod kay ginpapuraw sa kalayo sing makapito ka beses.

⁷Ginoo, tipigi kami permi, kag ilikaw kami sa mga malaot sa tanan nga tion.

⁸Kay bisan diin makita ang mga malaot kag ginadayaw pa sang mga tawo ang kalautan.