Read Hiligaynon Psalms 129 Bible Online

Psalms 129 - Hiligaynon bible

Psalms 129

¹Pangamuyo Batok sa mga Kaaway sang Israel Mga taga-Israel, ihambal ninyo kon daw ano ang pagpaantos sa inyo sang inyo mga kaaway halin sang pagsugod sang inyo nga nasyon.

²“Puwerte gid ang ila nga pagpaantos sa amon halin sang pagsugod sang amon nga nasyon. Pero wala gid nila kami malaglag.

³Ginpilasan nila sing madalom ang amon mga likod; daw pareho ini sa inarado nga duta.

⁴Pero matarong ang Ginoo, kay ginhilway niya kami sa pag-ulipon sa amon sang mga malaot.”

⁵Kabay pa nga magpalalagyo sa kahuya ang tanan nga nagadumot sa Zion.

⁶Kabay pa nga mangin pareho sila sa hilamon nga nagatubo sa atop sang balay, nga sang pag-ulhot nalaya dayon.

⁷Wala sing may nagatipon sa sini nga hilamon ukon nagadala sini nga nabugkos.

⁸Kabay pa nga wala sing may nagaagi nga magasiling sa ila, “Kabay pa nga bendisyunan kamo sang Ginoo! Ginabendisyunan namon kamo sa ngalan sang Ginoo.”