Read Hiligaynon Psalms 132 Bible Online

Psalms 132 - Hiligaynon bible

Psalms 132

¹Pagdayaw sa Templo sang Dios Ginoo, indi pagkalimti si David kag ang tanan nga kabudlayan nga ginbatas niya.

²Dumduma ang iya promisa sa imo, Ginoo, ang Gamhanan nga Dios ni Jacob. Nagpromisa siya nga,

³“Indi ako magpauli ukon maghigda

⁴ukon magtulog

⁵hasta nga makakita ako sang lugar nga para puy-an sang Ginoo, ang Gamhanan nga Dios ni Jacob.”

⁶Sang didto kami sa Efrata nakabati kami kon diin ang Kahon sang Kasugtanan, kag nakita namon ini sa latagon sang Jaar.

⁷Dayon nagsiling kami, “Makadto kita sa templo sang Ginoo kag magsimba sa atubangan sang iya trono.”

⁸Sige na, Ginoo, kadto ka sa imo templo upod sang Kahon sang Kasugtanan nga simbolo sang imo gahom.

⁹Kabay pa nga magkabuhi permi sing matarong ang imo mga pari kag magkanta sa kalipay ang imo matutom nga katawhan.

¹⁰Tungod kay David nga imo alagad, indi pag-isikway ang imo pinili nga hari.

¹¹Nagpromisa ka sadto kay David, kag sigurado nga tumanon mo kag indi pagbawion. Siling mo: “Ang isa sang imo mga kaliwat pabuslon ko sa imo bilang hari.

¹²Kon tumanon sang imo mga kaliwat nga mga hari ang akon kasugtanan kag ang mga pagpanudlo nga gintudlo ko sa ila, ang ila mga kaliwat magahari man hasta san-o.”

¹³Matuod nga ginpili kag ginhandom sang Ginoo ang Zion nga iya puy-an. Siling niya,

¹⁴“Amo ini ang akon puluy-an hasta san-o; diri ako magapuyo kay ginhandom ko ini.

¹⁵Hatagan ko ang Zion sang tanan niya nga kinahanglanon, kag bisan ang iya mga pumuluyo nga mga imol busgon ko sang pagkaon.

¹⁶Permi ko luwason ang iya mga pari, kag ang iya matutom nga mga pumuluyo magakanta permi sa kalipay.

¹⁷“Paharion ko sa Zion ang hari nga kaliwat ni David nga pareho sa isa ka suga.

¹⁸Pakahuy-an ko ang iya mga kaaway, pero pauswagon ko ang iya ginharian.”