Read Hiligaynon Psalms 135 Bible Online

Psalms 135 - Hiligaynon bible

Psalms 135

¹Kanta sa Pagdayaw Dayawa ang Ginoo! Dayawa ninyo siya, kamo nga iya mga alagad

²nga nagaalagad sa templo sang Ginoo nga aton Dios.

³Dayawa ang Ginoo kay maayo siya. Magkanta kamo sang pagdayaw sa iya kay maayo ina nga himuon.

⁴Dayawa ninyo siya kay ginpili niya ang katawhan sang Israel nga mga kaliwat ni Jacob, nga mangin iya espesyal nga katawhan.

⁵Nakahibalo ako nga ang Ginoo gamhanan, kag labaw sa tanan nga dios.

⁶Ginahimo sang Ginoo ang bisan ano nga naluyagan niya sa langit, sa duta, sa mga dagat kag sa mga kadadalman sini.

⁷Ginadala niya paibabaw ang mga panganod halin sa pinakamalayo nga parte sang kalibutan, kag nagapadala siya sang mga kilat upod sa ulan. Ginapaguwa niya ang hangin halin sa ila talaguan.

⁸Ginpamatay niya ang mga kamagulangan nga lalaki sang mga taga-Egipto kag pati ang mga kamagulangan sang ila mga sapat.

⁹Didto sa Egipto, naghimo siya sang mga milagro kag makatilingala nga mga butang sa pagsilot sa hari sang Egipto kag sa tanan niya nga opisyal.

¹⁰Ginpanglaglag niya ang madamo nga mga nasyon kag ginpamatay niya ang gamhanan nga mga hari

¹¹pareho kay Sihon nga hari sang mga Amornon, kay Og nga hari sang Bashan, kag ang tanan nga hari sang Canaan.

¹²Kag ginhatag niya ang ila duta sa iya katawhan nga mga Israelinhon agod ila panag-iyahan.

¹³Ginoo, ang imo ngalan kag pagkabantog dumdumon hasta san-o.

¹⁴Kay pamatud-an mo, Ginoo, nga wala sing sala ang imo katawhan nga imo mga alagad, kag kaluoyan mo sila.

¹⁵Ang mga dios-dios sang iban nga mga nasyon hinimo man lang sang tawo halin sa pilak kag bulawan.

¹⁶May mga baba ini, pero indi makahambal, may mga mata, pero indi makakita,

¹⁷may mga dulunggan, pero indi makabati, kag wala ini nagaginhawa.

¹⁸Ang mga nagahimo sang sini nga mga dios-dios kag ang tanan nga nagasalig sa ila mangin pareho man sa ila nga wala sing pulos.

¹⁹Kamo nga katawhan sang Israel, pati kamo nga mga kaliwat ni Aaron kag iban pa nga mga kaliwat ni Levi, dayawa ninyo ang Ginoo! Kamo nga nagatahod sa Ginoo, dayawa ninyo siya!

²¹Dayawa ang Ginoo nga ara sa Zion, ang siyudad sang Jerusalem nga iya puluy-an. Dayawa ang Ginoo!