Read Hiligaynon Psalms 139 Bible Online

Psalms 139 - Hiligaynon bible

Psalms 139

¹Ang Bug-os nga Ihibalo kag Pag-atipan sang Dios Ginoo, gin-usisa mo ako gani kilala mo ako.

²Nahibaluan mo kon nagapungko ako ukon nagatindog. Bisan ara ka sa malayo nahibaluan mo ang tanan ko nga ginahunahuna.

³Ginatan-aw mo ako sa akon pag-obra kag pagpahuway. Nahibaluan mo ang tanan ko nga ginahimo.

⁴Ginoo, bisan wala pa ako makahambal, nahibaluan mo na ang akon inughambal.

⁵Ginalibutan mo ako, kag ginaprotektaran mo ako sang imo gahom.

⁶Ang imo nahibaluan parte sa akon tama gid ka makatilingala; indi ko ini matungkad.

⁷Diin bala ako makapalagyo sa imo Espiritu? Diin bala ako makakadto nga wala ikaw?

⁸Kon magsaka man ako sa langit, didto ikaw; kon magkadto man ako sa lugar sang mga patay, didto man ikaw.

⁹Kon magkadto man ako pasidlangan ukon mag-estar sa pinakamalayo nga lugar sa nakatundan,

¹⁰didto ikaw sa pagtuytoy kag sa pagbulig sa akon.

¹¹Ibutang ta abi nga pangabayon ko ang kadulom sa pagtabon sa akon, ukon ang kasanag nga nagalibot sa akon nga mangin gab-i.

¹²Pero bisan ang kadulom indi madulom para sa imo, kag ang gab-i pareho lang kasanag sang adlaw. Kay ang kadulom kag ang kasanag pareho lang sa imo.

¹³Kilala mo ako kay ikaw ang naghimo sang akon bug-os nga kabuhi. Ikaw ang nagporma sa akon sa tiyan sang akon iloy.

¹⁴Ginadayaw ko ikaw kay makatilingala gid ang paghimo mo sa akon. Makatilingala ang imo mga binuhatan, kag nahibaluan ko gid ina.

¹⁵Nakita mo ang akon mga tul-an sang ginporma ako sing tago sa sulod sang tiyan sang akon iloy.

¹⁶Nakita mo na ako bisan wala pa ako maporma. Ang gintalana nga mga inadlaw nga magakabuhi ako nasulat na sa imo libro, bisan wala pa ini magsugod.

¹⁷O Dios, indi ko matungkad ang imo ginahunahuna; puwerte ini kadamo.

¹⁸Kon isipon ko ini, madamo pa ini sang sa balas. Kon magbugtaw ako ang akon hunahuna ara gihapon sa imo.

¹⁹O Dios, kabay pa nga pamatyon mo ang mga malaot! Kabay pa nga magpalagyo sa akon ang mga manugpatay sang tawo.

²⁰Nagahambal sila sing malain parte sa imo. Sila nga imo mga kaaway nagamitlang sang imo ngalan sa wala sing pulos.

²¹Ginoo, ginakainitan ko ang mga nagakainit sa imo. Ginakangil-aran ko ang mga nagakontra sa imo.

²²Puwerte gid ang akon kainit sa ila; ginakabig ko sila nga akon mga kaaway.

²³Usisaa ako, O Dios, agod mahibaluan mo ang akon tagipusuon. Tilawi ako, agod mahibaluan mo ang akon ginahunahuna.

²⁴Tan-awa kon may malaot ako nga pagginawi kag tuytuyi ako sa dalan nga dapat nakon agihan hasta san-o.