Read Hiligaynon Psalms 14 Bible Online

Psalms 14 - Hiligaynon bible

Psalms 14

¹Ang Kalaot sang mga Tawo (Salmo 53) Nagasiling ang mga buang-buang sa ila kaugalingon, “Wala sing Dios!” Malaot sila tanan kag makangilil-ad ang ila mga ginahimo. Wala sing bisan isa sa ila nga nagahimo sing maayo.

²Didto sa langit nagatan-aw ang Ginoo sa mga tawo sa pag-usisa kon bala may ara nga nakaintiendi sang kamatuoran kag nagadangop sa iya.

³Ang tanan nagsipak sa matuod nga dalan kag palareho nga naglain ang ila kabuhi. Wala gid sing bisan isa nga nagahimo sing maayo.

⁴Wala bala nakahibalo ining malaot nga mga tawo sang ila ginahimo? Siyempre nakahibalo! Ginakilkilan gani nila ang akon mga kasimanwa nga daw sa nagalamon lang sila sang pagkaon, kag wala sila nagapangamuyo sa Ginoo.

⁵Pero mahadlukan gid sila, kay pangapinan sang Dios ang mga matarong.

⁶Ginapakahuy-an nila ang mga plano sang mga kubos, pero ang Ginoo amo ang nagaprotektar sa mga kubos.

⁷Kuntani magaabot na ang magaluwas sa Israel nga halin sa Zion. Daw ano ayhan ka malipayon ang mga Israelinhon, ang katawhan sang Ginoo, kon ibalik na niya ang ila maayo nga kahimtangan.