Read Hiligaynon Psalms 140 Bible Online

Psalms 140 - Hiligaynon bible

Psalms 140

¹Pangamuyo para sa Bulig sang Dios Ginoo, luwasa ako sa malaot kag mapintas nga mga tawo.

²Nagaplano sila sing malain kag permi lang nila ginapaaway ang mga tawo.

³Ang ila dila pareho sa dalitan nga man-og; ang ila mga pulong makahalalit pareho sang dalit sang man-og.

⁴Protektari ako, Ginoo, sa kamot sang malaot kag mapintas nga mga tawo, nga nagaplano sa paglaglag sa akon.

⁵Nagbutang ang mga bugalon sang siod para sa akon; naghumlad sila sang ila mga lambat agod masiod nila ako sa akon alagyan.

⁶Ginoo, ikaw ang akon Dios. Pamatii, Ginoo, ang akon pagpakitluoy sa imo.

⁷Ginoong Dios, ikaw ang akon mabakod nga manluluwas; ginaprotektaran mo ako sa tion sang inaway.

⁸Ginoo, indi pag-ihatag sa mga malaot ang ila mga handom. Indi pag-itugot nga magmadinalag-on ang ila mga plano, kay basi kon magpabugal sila.

⁹Kabay pa nga ang malain nga mga plano sang akon mga kaaway nga nagapalibot sa akon matabo mismo sa ila.

¹⁰Kabay pa nga mahulugan sila sang nagadabadaba nga mga baga kag ihulog sila sa mga buho, nga indi na sila makabangon pa.

¹¹Kabay pa nga indi magdugay sa duta ang mga tawo nga nagabutang-butang sa iban. Kabay pa nga mag-abot ang kalalat-an sa mapintas nga mga tawo, nga magalaglag sa ila.

¹²Ginoo, nahibaluan ko nga ginaprotektaran mo ang kinamatarong sang mga kubos; ginahatagan mo sang hustisya ang mga imol.

¹³Sigurado gid nga dayawon ikaw sang mga matarong kag magakabuhi sila upod sa imo.