Read Hiligaynon Psalms 141 Bible Online

Psalms 141 - Hiligaynon bible

Psalms 141

¹Pangamuyo para sa Proteksyon sang Dios Ginoo, nagapanawag ako sa imo; buligi ako gilayon. Pamatii ang akon pagpanawag sa imo.

²Batuna ang akon pangamuyo bilang insenso. Batuna ang pagbayaw sang akon mga kamot sa pagpangamuyo bilang pangsirom nga halad.

³Ginoo, buligi ako nga indi ako makahambal sing malain.

⁴Ilikaw ako sa paghimo sing malain kag sa pag-intra sa mga ginahimo sang mga malaot. Ilikaw ako sa pagpakigbahin sa ila mga punsyon.

⁵Batunon ko kon magsabdong ukon magsaway sa akon ang matarong nga tawo; indi ko ina pagbalibaran kay ginahimo niya ina sa pagpakita sang iya paghigugma kag pagbaton sa akon. Pero sa malaot nga mga tawo permi ako nagapangamuyo batok sa ila malaot nga ginahimo.

⁶Kon ihaboy na ang ila mga manugdumala sa pil-as, magapati sila nga ang akon mga pulong matuod.

⁷Magasiling sila, “Magalalapta sa lulubngan ang aton mga tul-an pareho sa mga bato nga nagguluwa sang pag-arado sa duta.”

⁸Ginoong Dios, sa imo gid ako nagasalig; sa imo ako nagapangayo sang proteksyon, gani indi pag-itugot nga mapatay ako.

⁹Ilikaw ako sa mga siod nga ginbutang sang mga malaot para sa akon.

¹⁰Kabay pa nga sila mismo ang masiod sa ila kaugalingon nga mga siod, samtang ako makalikaw sini.