Read Hiligaynon Psalms 143 Bible Online

Psalms 143 - Hiligaynon bible

Psalms 143

¹Pangamuyo para sa Bulig sang Dios Ginoo, pamatii ang akon pangamuyo; pamatii ang akon pagpakitluoy. Tungod nga matarong kag matutom ikaw, buligi ako.

²Indi ako paghukmi nga imo alagad, kay wala sing bisan isa nga matarong sa imo atubangan.

³Ginahingabot gid ako sang akon mga kaaway. Ginpierdi nila ako kag ginbutang sa madulom nga prisohan; daw pareho ako sa tawo nga dugay na nga napatay.

⁴Gani nadulaan ako sang paglaom kag napuno sang kahadlok ang akon tagipusuon.

⁵Nadumduman ko ang mga ginhimo mo sang una; ginapamalandungan ko ang tanan mo nga binuhatan.

⁶Ginabayaw ko ang akon mga kamot sa imo sa akon pagpangamuyo; nauhaw ako sa imo pareho sa mamala nga duta nga nauhaw sa tubig.

⁷Sabta ako gilayon, Ginoo. Nadulaan na ako sang paglaom. Indi ka magpanago sa akon, kay basi mapatay ako.

⁸Kada aga, ipadumdom sa akon ang imo gugma, kay sa imo ako nagasalig. Ipakita sa akon ang husto nga dalan nga akon pagaagyan, kay sa imo ako nagapangamuyo.

⁹Luwasa ako sa akon mga kaaway, Ginoo, kay sa imo ako nagapangayo sang proteksyon.

¹⁰Tudlui ako sa pagsunod sang imo kabubut-on, kay ikaw ang akon Dios. Kabay pa nga ang imo maayo nga Espiritu magatuytoy sa akon sa kahimtangan nga wala sing katalagman.

¹¹Luwasa ako, Ginoo, agod mapadunggan ka. Tungod nga matarong ka, luwasa ako sa kalisod.

¹²Tungod sa imo gugma sa akon, pamatya ang akon mga kaaway, kay ako imo alagad.