Read Hiligaynon Psalms 144 Bible Online

Psalms 144 - Hiligaynon bible

Psalms 144

¹Pagpasalamat sang Hari sa Dios tungod sang Iya Pagdaog Dalayawon ang Ginoo nga akon palalipdan nga bato. Ginahanas niya ako sa pagpakig-away.

²Siya ang akon mahigugmaon nga Dios kag mabakod nga palanaguan. Siya ang akon dalangpan kag manughilway. Siya ang akon taming kag sa iya ako nagapangayo sang proteksyon. Ginapasakop niya sa akon ang mga nasyon.

³Ginoo, ano gid bala ang tawo nga ginakabalak-an mo gid? Tawo man lang siya, ngaa ginahunahuna mo gid?

⁴Pareho man lang siya sa hangin nga nagalabay kag ang iya mga inadlaw pareho sa landong nga umalagi lang.

⁵Ginoo, abrihi ang langit kag magpanaog ka. Tanduga ang mga bukid agod mag-alaso.

⁶Ipana ang mga kilat agod magpalalagyo ang akon mga kaaway kag maglalapta.

⁷Halin sa langit, dawata ako kag luwasa sa gahom sang mga kaaway nga taga-iban nga lugar, nga pareho sa mabaskog nga tubig.

⁸Ini sila wala nagasugid sing matuod kag nagabutig bisan sa ila pagsumpa.

⁹Kantahan ko ikaw, O Dios, sang bag-o nga kanta nga ginatukaran sang arpa.

¹⁰Ikaw ang nagpadaog sa mga hari kag nagluwas kay David nga imo alagad halin sa kamatayon.

¹¹Luwasa ako sa gahom sang mga kaaway nga taga-iban nga lugar, nga wala nagasugid sing matuod kag nagabutig bisan sa ila pagsumpa.

¹²Kabay pa nga ang amon mga anak nga lalaki, samtang pamatan-on pa sila, mangin pareho sa mga tanom nga nagatubo nga mabakod, kag ang amon mga anak nga babayi mangin pareho sa matahom nga mga haligi sang palasyo.

¹³Kabay pa nga mapuno ang amon bodega sang tanan nga klase sang patubas. Kabay pa nga magdamo gid ang amon mga karnero sa latagon,

¹⁴kag ang amon mga baka magkarga sing madamo nga mga produkto. Kabay pa nga indi na kami pagsalakayon sang mga kaaway kag indi na kami pagbihagon. Kag kabay pa nga wala na sing paghinibi sa kasubo sa amon mga dalan.

¹⁵Bulahan ang mga tawo nga may kahimtangan nga pareho sina. Bulahan ang mga tawo nga ang ila Dios amo ang Ginoo.