Read Hiligaynon Psalms 145 Bible Online

Psalms 145 - Hiligaynon bible

Psalms 145

¹Kanta sa Pagdayaw Dayawon ko ikaw, akon Dios nga Hari. Dayawon ko ikaw sa wala sing katapusan.

²Adlaw-adlaw dayawon ko ikaw, kag himuon ko ina sa wala sing katapusan.

³Gamhanan ka, Ginoo, kag takos gid nga dayawon. Ang imo pagkagamhanan indi gid matungkad.

⁴Ang kada henerasyon magasugid sa masunod nga henerasyon sang imo gamhanan nga mga binuhatan.

⁵Pamalandungan ko ang imo pagkahalangdon kag pagkagamhanan, kag ang imo makatilingala nga mga binuhatan.

⁶Ipanugid sang mga tawo ang pagkagamhanan sang imo makatilingala nga mga binuhatan, kag ibantala ko man ang imo pagkagamhanan.

⁷Ipanugid nila ang pagkabantog sang imo dako nga kaayo, kag magakanta sila parte sa imo pagkamatarong.

⁸Ginoo, maluluy-on ka kag mabinalak-on; mahigugmaon ka kag indi dali maakig.

⁹Maayo ka, Ginoo, sa tanan; mabinalak-on ka sa tanan mo nga ginhimo.

¹⁰Pasalamatan ka, Ginoo, sang tanan mo nga ginhimo; dayawon ka sang imo matutom nga katawhan.

¹¹Ipanugid nila ang pagkagamhanan sang imo paghari kag ang imo gahom,

¹²agod mahibaluan sang tanan nga katawhan ang imo gamhanan nga mga binuhatan kag ang pagkagamhanan sang imo paghari.

¹³Ang imo paghari wala sing katapusan. Matutom ka gid, Ginoo, sa imo mga promisa, kag mahigugmaon ka sa tanan mo nga ginhimo.

¹⁴Ginabuligan mo ang tanan nga ara sa kalisod kag ginapabakod ang tanan nga maluya.

¹⁵Ang tanan nga buhi nga tinuga nagasalig sa imo, kag ginahatagan mo sila sang ila pagkaon sa tion nga kinahanglan nila.

¹⁶Ginahatagan mo sila sing husto kag nagakabusog sila.

¹⁷Matarong ka, Ginoo, sa tanan mo nga pamaagi, kag maayo ka sa tanan mo nga ginahimo.

¹⁸Malapit ka, Ginoo, sa tanan nga nagapanawag sa imo sing sinsero.

¹⁹Ginahatag mo ang ginahandom sang mga nagatahod sa imo; ginapamatian mo ang ila pagpanawag, kag ginaluwas mo sila.

²⁰Ginabantayan mo ang tanan nga nagahigugma sa imo, pero ang tanan nga malaot laglagon mo.

²¹Dayawon ko ikaw, Ginoo. Ang tanan nga tinuga magdayaw sa imo sa wala sing katapusan.