Read Hiligaynon Psalms 146 Bible Online

Psalms 146 - Hiligaynon bible

Psalms 146

¹Pagdayaw sa Dios nga Manluluwas Dayawa ang Ginoo! Dapat dayawon ko gid ang Ginoo.

²Dayawon ko siya sa bug-os ko nga kabuhi. Kantahan ko ang akon Dios sang mga pagdayaw samtang nagakabuhi ako.

³Indi kamo magsalig sa gamhanan nga mga tawo kag sa kay bisan sin-o, kay indi sila makaluwas sa inyo.

⁴Kon mapatay na sila nagabalik sila sa duta, kag sa sina nga adlaw ang ila mga plano nangin wala sing pulos.

⁵Bulahan ang tawo nga ang nagabulig sa iya amo ang Dios ni Jacob, nga ang iya pagsalig ara sa Ginoo nga iya Dios,

⁶nga amo ang naghimo sang kalangitan kag sang kalibutan, sang dagat kag sang tanan nga ara sa sini. Masaligan gid ang Ginoo sa wala sing katapusan.

⁷Nagahukom siya pabor sa mga ginapigos, kag nagahatag siya sang pagkaon sa mga ginagutom. Ginahilway niya ang mga ginbihag,

⁸ginaayo niya ang mga bulag agod makakita, ginapabakod niya ang mga maluya, ginahigugma niya ang mga matarong,

⁹ginabantayan niya ang mga dumuluong, ginabuligan niya ang mga ilo kag mga balo nga babayi, pero ginaguba niya ang mga pamaagi sang mga malaot.

¹⁰Mga pumuluyo sang Zion, ang Ginoo nga inyo Dios nagahari sa wala sing katapusan! Dayawa ang Ginoo!