Read Hiligaynon Psalms 148 Bible Online

Psalms 148 - Hiligaynon bible

Psalms 148

¹Ang Panawagan sa Pagdayaw sa Ginoo Dayawa ang Ginoo! Dayawa ninyo ang Ginoo, kamo nga ara sa kalangitan.

²Dayawa ninyo siya, tanan kamo nga iya mga anghel, nga iya mga soldado sa langit.

³Dayawa ninyo siya, adlaw, bulan, kag mga bituon.

⁴Dayawa ninyo siya, pinakamataas nga langit kag tubig sa ibabaw.

⁵Magdayaw sila tanan sa Ginoo! Kay sa iya pagmando, natuga sila tanan.

⁶Ginpahamtang niya sila sa ila mga lugar sa wala sing katapusan, kag wala sing may makalapas sini.

⁷Dayawa ninyo ang Ginoo, kamo nga ara sa kalibutan, dalagko nga mga sapat sa kadagatan, kag tanan nga kadadalman sang dagat.

⁸Dayawa ninyo ang Ginoo, mga kilat, ulan nga yelo, mga panganod, kag mabaskog nga hangin nga nagatuman sa iya sugo.

⁹Dayawa ninyo ang Ginoo, mga bukid, mga kahoy nga nagapamunga ukon wala,

¹⁰tanan nga sapat: anta ukon indi, mga sapat nga nagakamang, kag mga nagalupad.

¹¹Dayawa ninyo ang Ginoo, kamo nga mga hari, mga opisyal, mga manugdumala, kag tanan nga katawhan sa kalibutan;

¹²mga pamatan-on, mga tigulang kag mga bata.

¹³Magdayaw sila tanan sa Ginoo, kay labaw siya sa tanan. Mas gamhanan siya sang sa tanan nga ara sa kalangitan.

¹⁴Ginapabaskog niya kag ginapadunggan ang iya matutom nga katawhan, ang Israel nga palangga gid niya. Dayawa ang Ginoo!