Read Hiligaynon Psalms 149 Bible Online

Psalms 149 - Hiligaynon bible

Psalms 149

¹Ang Kanta sa Pagdayaw Dayawa ang Ginoo! Magkanta kamo sang bag-o nga kanta sa Ginoo. Dayawa siya sa pagtililipon sang iya matutom nga katawhan.

²Magkalipay ang mga taga-Israel tungod sang ila Manunuga. Magkinasadya ang katawhan sang Zion tungod sang ila Hari.

³Magdayaw sila sa iya nga may pagsinaot; kag magtukar sila sang tamborin kag mga arpa sa pagdayaw sa iya.

⁴Kay nagakalipay ang Ginoo sa iya katawhan; ginapadunggan niya sila nga mga kubos paagi sa pagpadaog sa ila.

⁵Magkalipay sila nga matutom sa iya tungod sang ila pagdaog; magkanta sila sa kalipay bisan sa ila mga hiligdaan.

⁶Magdayaw sila sing mabaskog sa Dios samtang nagauyat sila sang matalom nga mga espada,

⁷sa pagpanimalos kag pagsilot sa mga katawhan sang mga nasyon,

⁸sa pagkadena sang ila mga hari kag mga pangulo,

⁹sa pagsilot sa ila suno sa ginsugo sang Dios. Ini para sa kadayawan sang tanan nga iya matutom nga katawhan. Dayawa ang Ginoo!