Read Hiligaynon Psalms 16 Bible Online

Psalms 16 - Hiligaynon bible

Psalms 16

¹Pangamuyo nga May Pagsalig sa Dios O Dios, tipigi ako, kay sa imo ako nagapangayo sang proteksyon.

²Ikaw ang akon Ginoo, kag sa imo lang naghalin ang tanan nga maayo nga nabaton ko.

³Kon parte sa imo matutom nga katawhan sa duta sang Israel nga mga maayo gid, dako ang akon kalipay sa ila.

⁴Pero ang mga nagadangop sa mga dios-dios nagadamo ang ila mga kalisod. Indi ako magpakig-upod sa ila nga paghalad sang dugo sa mga dios-dios, kag indi gid ako magmitlang sang mga ngalan sang sina nga mga dios-dios.

⁵Ginoo, ikaw ang tanan para sa akon. Ginahatag mo ang tanan ko nga ginakinahanglan. Ang akon kabuhi ara sa imo mga kamot.

⁶Daw ano kanami sang imo mga ginhatag sa akon. Huo, maayo gid ang akon mga nabaton sa imo.

⁷Ginadayaw ko ikaw, Ginoo, kay ginalaygayan mo ako. Bisan kon gab-i ang akon konsensya nagatudlo sa akon.

⁸Permi ko ikaw ginahunahuna, Ginoo. Kag tungod nga ara ka sa akon tupad, indi ako matublag.

⁹Amo ina nga malipayon ako; ang akon kabuhi puno sang kalipay. Kag magakabuhi ako nga luwas sa katalagman,

¹⁰kay indi mo ako pagpabay-an nga magkadto sa lugar sang mga patay. Indi mo pagtugutan nga madunot ang imo matutom nga alagad.

¹¹Ginatudluan mo ako kon paano ko maangkon ang padayon nga kabuhi. Tungod sang imo presensya, malipayon gid ako; wala sing katapusan ang akon kalipay sa tupad mo.