Read Hiligaynon Psalms 18 Bible Online

Psalms 18 - Hiligaynon bible

Psalms 18

¹Ang Kanta ni David sa Iya nga Pagdaog (2 Sam. 22:1-51) Ginoo nga akon kusog, ginahigugma ko ikaw.

²Ikaw, Ginoo, ang akon palalipdan nga bato, ang akon mabakod nga palanaguan kag manughilway. Bilang palalipdan nga bato, makapanago ako sa imo. Ikaw ang akon taming, gamhanan nga manluluwas, kag dalangpan.

³Dalayawon ka, Ginoo, kay kon magpangayo ako sang bulig sa imo ginaluwas mo ako sa akon mga kaaway.

⁴Ang kamatayon daw pareho sa lubid nga nagburambod sa akon kag pareho sa siod sa akon alagyan. Ang kalaglagan daw pareho sa mabaskog nga baha nga naglapaw sa akon.

⁵

⁶Gani sa akon kalisod nagpanawag ako sa imo, Ginoo. Nagpangayo ako sang bulig sa imo nga akon Dios, kag ginpamatian mo ang akon pangamuyo sa imo templo.

⁷Dayon naglinog, kag pati ang mga pundasyon sang mga bukid nag-uyog, tungod kay naakig ka, Ginoo.

⁸Nagguwa ang aso sa imo ilong, kag sa imo baba nagguwa ang makahalalit nga kalayo kag nagadabdab nga mga baga.

⁹Ginbuksan mo ang langit pareho sang pagbukas sang kurtina, kag nagpanaog ka nga nagatungtong sa madamol nga gal-om.

¹⁰Nagsakay ka sa kerubin, kag madasig ini nga naglupad samtang ginapalid sang hangin.

¹¹Ginhimo mo ang kadulom nga tabon sa imo palibot. Nagpanago ka sa madamol nga gal-om.

¹²Nagpangilat sa imo atubangan, kag halin sa panganod nagguwa ang mga yelo kag ang nagadabdab nga mga baga.

¹³Ang tingog mo Ginoo, nga Labing Mataas nga Dios, nagdaguob sa langit.

¹⁴Ginpana mo sang kilat ang imo mga kaaway, kag nagpalalagyo sila nga nagasalasala.

¹⁵Sa imo nga pagsabdong kag puwerte nga kaakig nagakahubas ang dagat kag makita ang duta sa idalom sini, kag makita man ang pundasyon sang kalibutan.

¹⁶Halin sa langit gindawat mo ako kag ginkuha sa madalom nga tubig.

¹⁷Ginluwas mo ako sa akon gamhanan nga mga kaaway nga indi ko masarangan.

¹⁸Ginsalakay nila ako sang nalisdan ako, pero gin-apinan mo ako, Ginoo.

¹⁹Ginluwas mo ako sa katalagman kay nalipay ka sa akon.

²⁰Ginapakamaayo mo ako tungod nga matarong ang akon kabuhi kag wala ako sing may nahimo nga sala.

²¹Kay ginasunod ko ang imo mga pamaagi kag wala ako nagbiya sa imo Ginoo, nga akon Dios.

²²Ginatuman ko ang tanan mo nga sugo kag wala ko ginalapas ang imo mga pagsulundan.

²³Nakahibalo ka nga wala sing kasawayan ang akon kabuhi kag ginalikawan ko nga makasala.

²⁴Ginapakamaayo mo ako tungod nga nakita mo nga matarong ang akon kabuhi kag wala ako sing may nahimo nga sala.

²⁵Matutom ka sa mga matutom sa imo, kag maayo sa mga tawo nga maayo man.

²⁶Sinsero ka sa mga sinsero sa imo, kag maayo ka magpadihot sa mga malaot.

²⁷Huo, ginaluwas mo ang mga mapainubuson, pero ginapaubos mo ang mga matinaas-taason.

²⁸Ginoo nga akon Dios, ikaw ang akon kasanag. Sa kadulom ikaw ang akon suga.

²⁹Sa imo bulig masarangan ko nga salakayon ang panong sang mga soldado, kag masarangan ko nga sakaon ang pader nga nagapalibot sa siyudad.

³⁰Ang imo pamaagi, O Dios, wala sing sayop. Ang imo pulong masaligan gid. Pareho ka sa taming sa tanan nga nagapangayo sang proteksyon sa imo.

³¹Ikaw lang, Ginoo, amo ang Dios; ikaw lang ang amon palalipdan nga bato.

³²Ikaw ang nagahatag sa akon sang kusog kag ang nagabantay sa akon dalanon.

³³Ginapabaskog mo ang akon tiil pareho sa tiil sang usa, agod maagwanta ko ang pagtaklad sa mataas nga mga lugar.

³⁴Ginahanas mo ako sa pagpakig-away pareho abi sa pagbinat sang mabakod nga pana.

³⁵Ginaprotektaran mo ako pareho sa taming, gani luwas ang akon kabuhi. Ginatipigan mo ako paagi sa imo gahom, kag paagi sa imo bulig nangin bantog ako.

³⁶Ginahatagan mo ako sang matawhay nga alagyan, gani wala nagakasandad ang akon mga tiil.

³⁷Ginlagas ko ang akon mga kaaway kag naabutan ko sila. Kag wala gid ako magbalik hasta nga nalaglag ko sila.

³⁸Ginlaglag ko sila kag natumba sila sa akon tiilan kag indi na sila makabangon pa.

³⁹Ginhatagan mo ako sang kusog sa pagpakig-away kag ginpadaog sa akon mga kaaway.

⁴⁰Ginpatal-as mo ang akon mga kaaway kag ginlaglag ko sila.

⁴¹Nagpangayo sila sang bulig, pero wala sing may nagluwas sa ila. Nagpanawag sila sa imo, pero wala mo sila ginsabat.

⁴²Gindugmok ko sila hasta nga daw pareho na lang sila sa yab-ok nga ginapalid sang hangin. Gintasak-tasak ko sila pareho sa lutak sa mga dalan.

⁴³Ginluwas mo ako sa rebelde nga katawhan. Ginhimo mo ako nga pangulo sang mga nasyon. Ang mga taga-iban nga lugar nagaalagad sa akon.

⁴⁴Nagaluhod sila sa akon sa kahadlok kag nagatuman dayon sang akon mando.

⁴⁵Nadulaan sila sang kaisog, gani nagaguwa sila sa ila mga palanaguan nga nagakurog sa kahadlok.

⁴⁶Buhi ka, Ginoo! Dalayawon ka nga akon palalipdan nga bato! Ginapakataas ko ikaw tungod nga ikaw ang Dios nga akon manluluwas.

⁴⁷Ginabalusan mo ang akon mga kaaway, kag ginapasakop mo ang mga nasyon sa akon.

⁴⁸Ginaluwas mo ako sa akon mapintas nga mga kaaway, kag ginapadaog mo ako sa ila.

⁴⁹Gani padunggan ko ikaw sa mga nasyon. Kantahan ko ikaw sang mga pagdayaw.

⁵⁰Ginahatagan mo sang dako nga mga kadalag-an ang imo pinili nga hari. Ginahigugma mo si David kag ang iya mga kaliwat sa wala sing katapusan.