Read Hiligaynon Psalms 19 Bible Online

Psalms 19 - Hiligaynon bible

Psalms 19

¹Ang Pagkagamhanan sang Dios nga Makita sa Iya mga Gintuga Ang kalangitan nagapahayag sang gahom sang Dios kag nagapakita sang iya ginhimo.

²Ang kada adlaw kag kada gab-i daw sa nagasugid parte sa gahom sang Dios.

³Wala sing pulong ukon tingog nga mabatian sa ila,

⁴pero ang ila mensahi nagalambot sa bug-os nga kalibutan; nagalapnag ini sa bisan diin nga lugar. Naghimo ang Dios sa kalangitan sang elistaran sang adlaw.

⁵Kag halin didto nagaguwa ang adlaw kon aga nga malipayon pareho sa nobyo nga nagaguwa sa lugar nga sa diin siya ginkasal, ukon pareho sa kampyon nga manugdalagan, nga handa sa pagdalagan.

⁶Nagabutlak ini sa sidlangan kag nagasalop sa nakatundan. Kag wala sing may makapanago sa iya nga init.

⁷Ang Kasuguan sang Ginoo Ang kasuguan sang Ginoo wala sing sayop. Nagapabaskog ini sang aton kabuhi. Ang mga pagpanudlo sang Ginoo masaligan kag nagahatag sang kaalam sa mga wala sing alam.

⁸Ang mga pagsulundan sang Ginoo husto kag nagahatag sang kalipay. Ang mga sugo sang Ginoo wala sing sayop kag nagapasanag sa hunahuna sang tawo.

⁹Ang pagtahod sa Ginoo maayo, kag dapat himuon ini hasta san-o. Ang paghukom sang Ginoo sigurado kag matarong.

¹⁰Ini nga mga butang mas malahalon pa sang sa puro gid nga bulawan. Kag mas matam-is pa sang sa puro gid nga dugos.

¹¹Nagahatag man ini sang paandam sa akon nga imo alagad, Ginoo. Kag kon ginatuman ko ini makabaton ako sang dako nga balos.

¹²Kon kaisa indi mahibaluan sang tawo nga nakasala siya. Gani, Ginoo, tinlui ako sa mga sala nga wala ko mahibalui!

¹³Buligi man ako nga indi makahimo sing hungod nga sala kag indi pag-itugot nga ulipunon ako sini, agod wala sing kasawayan ang akon kabuhi kag hilway sa madamo nga klase sang mga sala.

¹⁴Kabay pa nga ang akon mga ginahambal kag mga ginahunahuna makapalipay sa imo, Ginoo, nga akon palalipdan nga bato kag manunubos.