Read Hiligaynon Psalms 21 Bible Online

Psalms 21 - Hiligaynon bible

Psalms 21

¹Pagdayaw Tungod sang Pagdaog Nagakalipay ang imo pinili nga hari, Ginoo, tungod kay ginhatagan mo siya sang kusog. Puwerte ang iya kalipay tungod kay ginpadaog mo siya.

²Ginhatag mo sa iya ang iya ginahandom; ginsabat mo ang iya ginapangayo.

³Ginbaton mo siya kag ginhatagan sang maayo nga mga butang. Ginkoronahan mo siya sang korona nga puro gid bulawan.

⁴Nangayo siya sa imo sang dugang nga kabuhi, kag ginhatagan mo siya sang malawig gid nga kabuhi.

⁵Tungod sang imo pagpadaog sa iya nangin bantog kag dungganon gid siya.

⁶Ginhatagan mo siya sang mga pagpakamaayo nga magapadayon hasta san-o. Ginlipay mo gid siya sang imo presensya,

⁷kay nagasalig siya sa imo, Ginoo, nga Labing Mataas nga Dios. Kag tungod sang imo paghigugma sa iya indi siya maano.

⁸Ang imo gahom amo ang magapierdi sang tanan mo nga mga kaaway.

⁹Kon magpakita ka na laglagon mo sila kag mangin pareho sila sa nagadabadaba nga hurnohan. Sa imo nga kaakig ipalamon mo sila sa kalayo.

¹⁰Pamatyon mo ang tanan nila nga kaliwat, kag wala gid sing may mabilin sa ila.

¹¹Nagaplano sila sing malain kontra sa imo, pero indi gid sila magmadinalag-on.

¹²Kay magapalalagyo sila kon makita nila nga handa ka na sa pagsilot sa ila, nga daw ginabinat mo kag ginapuntirya sa ila ang imo pana.

¹³Dalayawon ka, Ginoo, tungod sang imo kusog. Magakanta kami sang mga pagdayaw tungod sang imo gahom.