Read Hiligaynon Psalms 22 Bible Online

Psalms 22 - Hiligaynon bible

Psalms 22

¹Buligan sang Dios ang mga Nagaantos Dios ko, Dios ko, ngaa ginpabay-an mo ako? Ngaa nga malayo ka sa akon? Nagaugayong na ako sa pag-antos, pero wala mo man lang gihapon ako ginabuligan.

²Dios ko, adlaw-gab-i nagapanawag ako sa imo, pero wala mo ako ginasabat, gani wala ako sing kapahuwayan.

³Pero balaan ka, kag ginadayaw ka sang mga Israelinhon bilang hari.

⁴Nagsalig sa imo ang amon mga katigulangan kag ginluwas mo sila.

⁵Nagpanawag sila sa imo kag ginbuligan mo sila. Nagsalig sila sa imo kag wala sila mapaslawi.

⁶Ginapakahuy-an ako kag ginapakalain sang mga tawo. Nagasiling sila nga daw sa ulod ako kag indi tawo.

⁷Ang makakita sa akon nagayaguta kag nagainsulto sa akon, kag nagalungo-lungo sila nga nagasiling,

⁸“Nagasalig ka man bala sa Ginoo, ti ngaa wala ka niya pagluwasa? Kon matuod nga nalipay siya sa imo, ti ngaa wala ka niya pagbuligi?”

⁹Pero ikaw ang nagpaguwa sa akon sa tiyan sang akon iloy, kag halin sang lapsag pa ako ginahalungan mo na ako.

¹⁰Halin sang akon pagkatawo, sa imo ako gintugyan kag ikaw lang ang akon Dios.

¹¹Gani indi ako pagbayai, kay malapit na nga mag-abot ang kalisod kag wala sing may magbulig sa akon.

¹²Ginalibutan ako sang madamo nga mga kaaway, pareho sila sa makusog nga mga toro nga baka sang Bashan.

¹³Pareho man sila sang leon nga nagangurob kag naganganga, nga handa na sa paggus-ab.

¹⁴Nadulaan ako sang kusog; pareho ako sa tubig nga ginaula, kag ang tanan ko nga tul-an daw sa nagliw-as. Nadulaan ako sang kaisog; pareho ako sa kandila nga nagakatunaw.

¹⁵Nadulaan ako sang kusog; pareho ako sa nagabagtik nga duta, kag ang akon dila nagapilit sa akon alingagngag. Ginoo, ginapabay-an mo ako nga daw mapatay.

¹⁶Ginlibutan ako sang grupo sang malaot nga mga tawo nga pareho sa mga ido. Ginbuhuan nila ang akon mga kamot kag mga tiil.

¹⁷Nagaguluwa na ang akon mga tul-an, kag ginatulok lang nila ako.

¹⁸Ginpartida nila ang akon mga bayo paagi sa paggabot-gabot.

¹⁹Pero ikaw, Ginoo, indi magpalayo sa akon. Ikaw nga akon kusog, buligi ako gilayon.

²⁰Luwasa ako sa espada sang akon mga kaaway; luwasa ang akon kabuhi sa sina nga mga ido.

²¹Luwasa ako sa sina nga mga leon. Sabta ang akon pangamuyo nga luwason mo ako sa mga sungay sinang turo nga mga baka.

²²Ipahayag ko sa akon mga kasimanwa ang imo mga ginhimo. Dayawon ko ikaw sa ila mga pagtililipon.

²³Kamo nga nagatahod sa Ginoo, dayawa ninyo siya! Kamo nga mga kaliwat ni Israel, nga amo si Jacob, padunggi kag kahadluki ninyo ang Ginoo!

²⁴Kay wala niya ginabaliwala ukon ginapakalain ang mga pag-antos sang mga kubos. Wala niya sila ginatalikdan kundi ginapamatian niya ang ila pagpangayo sang bulig.

²⁵Hatagan mo ako, Ginoo, sang inspirasyon nga magdayaw sa imo sa mga pagtililipon sang imo katawhan. Sa atubangan sang mga nagatahod sa imo tumanon ko ang akon ginpromisa nga maghalad sa imo.

²⁶Magakaon ang mga kubos kag mabusog sila. Ang mga nagadangop sa imo magadayaw sa imo. Kabay pa nga mangin maayo kag malawig ang ila kabuhi.

²⁷Ang bug-os nga kalibutan magadumdom kag magabalik sa imo, Ginoo. Simbahon ka sang tanan nga katawhan sang mga nasyon.

²⁸Kay ikaw ang nagahari, kag ikaw ang nagadumala sang mga nasyon.

²⁹Sigurado nga magasimba sa imo ang tanan nga manggaranon sa kalibutan. Bisan ang tanan nga tawo nga daw sa mapatay na magaluhod sa imo. Kag atong mga nagkalamatay na,

³⁰ang ila mga kaliwat magaalagad sa imo. Tudluan parte sa imo, Ginoo, ang palaabuton nga mga henerasyon.

³¹Sila nga wala pa matawo pagasugiran nga ginluwas mo ang imo katawhan, kag ikaw gid ang naghimo sini.