Read Hiligaynon Psalms 24 Bible Online

Psalms 24 - Hiligaynon bible

Psalms 24

¹Ang Dios Gamhanan nga Hari Ang bug-os nga kalibutan kag ang tanan nga ara sa sini iya sang Ginoo.

²Kay siya ang nagtukod sang kalibutan sa madalom nga tubig.

³Sin-o bala ang puwede nga makataklad sa bukid sang Ginoo? Sin-o bala ang puwede nga makasulod sa iya balaan nga templo?

⁴Ang tawo nga may matinlo nga mga binuhatan kag hunahuna, wala nagasimba sa mga dios-dios, kag wala nagasumpa sing butig.

⁵Pakamaayuhon siya kag pakamatarungon sang Ginoo, ang Dios nga iya manluluwas.

⁶Amo ina nga klase sang tawo ang nagadangop kag nagasimba sa Dios ni Jacob.

⁷Abrihi ang daan nga mga puwertahan sang templo agod makasulod ang gamhanan nga Hari!

⁸Sin-o bala ining gamhanan nga Hari? Siya amo ang Ginoo nga makusog kag mabakod sa inaway.

⁹Abrihi ang daan nga mga puwertahan sang templo agod makasulod ang gamhanan nga Hari!

¹⁰Sin-o bala ining gamhanan nga Hari? Siya amo ang Ginoo nga makagagahom. Huo, siya ang gamhanan nga Hari.