Read Hiligaynon Psalms 27 Bible Online

Psalms 27 - Hiligaynon bible

Psalms 27

¹Pangamuyo nga may Pagdayaw Ang Ginoo amo ang akon kasanag, manluluwas, kag mabakod nga dalangpan, gani wala ako sing kahadlukan.

²Sa tion nga salakayon ako sang akon malaot nga mga kaaway agod patyon, sila ang mapierdi kag indi ako.

³Bisan pa nga libutan ako sang madamo nga mga soldado, indi ako mahadlok. Bisan pa nga salakayon nila ako, magasalig gihapon ako sa Dios.

⁴Nagapangayo ako sa Ginoo sang isa ka butang nga ginahandom ko gid. Ini amo nga makapuyo ako sa iya templo sa bug-os ko nga kabuhi. Kag didto magapamalandong ako sang iya kaayo kag magapangayo sang iya pagtuytoy.

⁵Kay sa tion sang katalagman taguon niya ako kag protektaran sa iya templo. Ipahamtang niya ako sa lugar nga luwas ako sa katalagman.

⁶Gani mangin madinalag-on ako batok sa akon mga kaaway nga nagalibot sa akon kag magahalad ako sa templo sang Ginoo nga may paghugyaw sa kalipay. Magakanta ako sa iya!

⁷Pamatii ako, Ginoo, kon magpanawag ako sa imo; kaluoyi ako kag sabta ang akon pangamuyo.

⁸Nagpanghikot ka sa akon tagipusuon nga magdangop ako sa imo, gani nagdangop ako sa imo, Ginoo.

⁹Indi ka magpanago sa akon! Indi ako pagsikwaya sa imo kaakig sa akon, nga imo alagad. Ikaw ang nagabulig sa akon, gani indi ako pagpabay-i ukon pagsikwaya, O Dios nga akon manluluwas.

¹⁰Bisan pa nga sikwayon ako sang akon amay kag iloy, tatapon mo ako, Ginoo.

¹¹Tudlui ako sang imo pamaagi. Tuytuyi ako sa husto nga dalan tungod sang akon mga kaaway.

¹²Indi ako pag-itugyan sa ila, kay ginaakusar nila ako sang indi matuod kag gusto nila ako nga halitan.

¹³Pero nagapati gid ako nga maeksperiensyahan ko ang imo kaayo samtang nagakabuhi ako diri sa duta.

¹⁴Magsalig kamo sa Ginoo! Magpakalig-on kamo kag indi madulaan sang paglaom. Magsalig lang kamo sa Ginoo!