Read Hiligaynon Psalms 30 Bible Online

Psalms 30 - Hiligaynon bible

Psalms 30

¹Pangamuyo nga Pagpasalamat Ginadayaw ko ikaw, Ginoo, kay ginluwas mo ako sa katalagman kag wala mo pagtuguti nga magkalipay ang akon mga kaaway sa akon kahimtangan.

²Ginoo nga akon Dios, nagapangayo ako sang bulig sa imo, kag gin-ayo mo ako.

³Ginluwas mo ako sa kamatayon. Wala mo pagtuguti nga mapatay ako.

⁴Magkanta kamo sang mga pagdayaw sa Ginoo, kamo nga iya matutom nga katawhan. Dayawa ninyo siya bilang pagdumdom sa iya pagkabalaan.

⁵Kay ang iya kaakig wala nagadugay, pero ang iya kaayo nagapadayon hasta san-o. Ayhan nagakasubo kita sa kagab-ihon, pero pag-abot sang kaagahon magakalipay kita.

⁶Ginoo, sa imo kaayo ginpalig-on mo ako pareho sa isa ka bukid. Kag tungod nga malig-on ang akon kahimtangan, nagsiling ako sa akon kaugalingon nga indi gid ako maano. Pero sang nagpanago ka sa akon, hinadlukan ako.

⁸Nagpanawag ako sa imo, Ginoo, nga nagapakitluoy. Siling ko,

⁹“Ano bala ang makuha mo kon mapatay ako? Makadayaw bala sa imo ang patay nga tawo? Makasugid bala siya sang imo katutom?

¹⁰Ginoo, pamatii ako kag kaluoyi. Buligi ako!”

¹¹Gani, ginbayluhan mo ang akon pagpangasubo sang malipayon nga pagsaot. Ginpauba mo sa akon ang sako nga ginsul-ob ko sang nagpangasubo ako, kag ginhatagan mo ako sang kalipay,

¹²agod indi lang ako maghipos, kundi magkanta ako sang mga pagdayaw sa imo. Ginoo nga akon Dios, pasalamatan ko ikaw sa wala sing katapusan.