Read Hiligaynon Psalms 32 Bible Online

Psalms 32 - Hiligaynon bible

Psalms 32

¹Pagtuad sang Sala kag Pagpangayo sang Patawad sa Dios Bulahan ang tawo nga ang iya mga paglapas ginpatawad, nga ang iya mga sala wala na ginadumdom sang Dios.

²Bulahan ang tawo nga ang iya mga sala indi na pag-isipon sang Ginoo batok sa iya kag wala siya nagapangdaya.

³Sang wala ko pa matuad ang akon mga sala, nagapalangluya ako, daw sa nagakamudmod ang akon mga tul-an, tungod sang akon pag-ugayong sa bilog nga adlaw.

⁴Kay adlaw-gab-i ginasilutan mo ako; nawad-an na ako sang kusog, pareho nga nabulad ako sa init sa tingadlaw.

⁵Dayon gintuad ko ang akon mga sala sa imo; wala ko ini gintago. Desidido ako sa pagtuad sang akon mga sala sa imo, kag ginpatawad mo ako.

⁶Gani ang tanan nga matutom dapat magpangamuyo sa imo sa tion sang kalisod, agod nga kon mag-abot ang kalisod nga daw sa baha, indi sila maano.

⁷Ikaw ang akon palanaguan; tipigan mo ako sa tion sang kalisod, kag palibutan mo ako sang mga tawo nga nagahinugyaw sa kalipay tungod sang imo pagluwas sa akon.

⁸Nagsiling ka sa akon, “Tudluan ko ikaw sang dalan nga dapat mo pagaagyan. Laygayan ko ikaw samtang nagabantay ako sa imo.

⁹Indi ka magpareho sa kabayo nga wala sing pag-intiendi, nga kinahanglan pa anay nga busalan kag rendahan agod magtuman.”

¹⁰Madamo ang mga kalisod sang mga malaot, pero ang nagasalig sa Ginoo higugmaon gid niya.

¹¹Gani kamo nga mga matarong, magkalipay kamo tungod sa ginhimo sang Ginoo sa inyo! Kamo nga nagakabuhi sing husto, maghinugyaw kamo sa kalipay!