Read Hiligaynon Psalms 33 Bible Online

Psalms 33 - Hiligaynon bible

Psalms 33

¹Kanta sa Pagdayaw Kamo nga mga matarong, maghinugyaw kamo sa kalipay tungod sa ginhimo sang Ginoo sa inyo. Kamo nga nagakabuhi sing husto, nagakabagay nga dayawon ninyo siya!

²Dayawa ninyo ang Ginoo paagi sa arpa. Tukari ninyo ang Ginoo sang iban pa nga mga instrumento nga may mga kuwerdas.

³Kantahi ninyo siya sang bag-o nga kanta; tukari ninyo siya sing maayo, kag maghinugyaw kamo sa kalipay.

⁴Kay ang pulong sang Ginoo husto, kag masaligan ang tanan niya nga ginahimo.

⁵Naluyag ang Ginoo maghimo sang matarong kag husto. Makita sa bug-os nga kalibutan ang iya gugma.

⁶Paagi sa pulong sang Ginoo, nahimo ang kalangitan: ang adlaw, ang bulan, kag ang mga bituon.

⁷Gintingob niya ang tubig sang dagat nga daw sa ginsulod sa botelya ukon ginbutang sa bodega.

⁸Ang tanan nga tawo sa kalibutan dapat magtahod sa Ginoo.

⁹Kay sang paghambal lang niya, natuga ang kalibutan. Nagmando lang siya kag nahimo ang tanan.

¹⁰Ginaguba sang Ginoo ang mga plano sang mga nasyon. Wala niya ginatuguti nga madayon ang ila mga katuyuan.

¹¹Pero ang iya mga plano nagapadayon sa wala sing katapusan; ang iya mga katuyuan nagapabilin hasta san-o.

¹²Bulahan ang nasyon nga ang iya Dios amo ang Ginoo. Bulahan ang katawhan nga ginpili sang Ginoo nga mangin iya.

¹³Ginatulok sang Ginoo sa langit ang tanan nga tawo.

¹⁴Didto sa iya ginapuy-an, ginatan-aw niya ang tanan nga nagapuyo sa kalibutan.

¹⁵Siya ang naghatag sang hunahuna sa tanan nga tawo, kag nahibaluan niya ang tanan nila nga ginahimo.

¹⁶Ang isa ka hari wala nagadaog sa inaway tungod lang sang iya madamo nga mga soldado. Ang isa ka soldado wala nagakaluwas sa inaway tungod lang sang iya puwerte nga kusog.

¹⁷Ang mga kabayo indi masaligan nga makapadaog sa inaway. Ang ila puwerte nga kusog indi makaluwas.

¹⁸Nagabantay ang Ginoo sa mga nagatahod sa iya, nga nagasalig sa iya gugma

¹⁹nga magaluwas sa ila sa kamatayon kag magatipig sang ila kabuhi sa tion sang gutom.

²⁰Nagahulat kita nga may pagsalig sa Ginoo. Siya ang nagabulig kag nagaprotektar sa aton.

²¹Nagakalipay kita tungod sa iya kay nagasalig kita sa iya, ang balaan nga Dios.

²²Ginoo, kabay pa nga ang imo gugma magpabilin sa amon, subong nga nagasalig kami sa imo.